Փետրվարին 9-ին Ադրբեջանում տեղի ունեցած արտահերթ խորհրդարանական ընտրություններն անցկացվել են զանգվածային կեղծիքների և անօրինականության պայմաններում: Ինչպես հաղորդում է ադրբեջանական Turan գործակալությունը՝ վկայակոչելով Ժողովրդավարական ուժերի Ազգային խորհրդի հայտարարությունը, ընտրությունների արդյունքները կեղծված են և չեն արտացոլում Ադրբեջանի ժողովրդի կամքը:
Լրատվամիջոցներում և սոցիալական ցանցերում տարածվել են անթիվ, անհամար խախտումները վկայող հոլովակներ, լուսանկարներ: «Այս անհերքելի փաստերը բավարար են, որպեսզի ընտրությունների արդյունքները չճանաչվեն»,-ասվում է հայտարարության մեջ:
Ազգային խորհուրդը նաև նշում է, որ անգամ արտահերթ ընտրությունների մասին որոշումն է հիմք տալիս կասկածի տակ դնել գործընթացի օրինականությունը, քանի որ որևէ հանրային քննարկում չի անցկացվել, կառավարությունը ևս խելամիտ հիմնավորում չի ներկայացրել՝ արտահերթ ընտրություններ անցկացնելու անհրաժեշտության հարցով:
Մատնանշվում է նաև, որ իրականությանը չի համապատասխանում նաև քվեարկությանը մասնակցած քաղաքացիների թիվը, անկախ դիտորների տվյալները ցույց են տալիս, որ մասնակցությունը կազմել է ոչ թե շուրջ 50 տոկոս, այլ 10-15 տոկոս:
Կարդացեք նաև
Հաշվի առնելով այն հանգամանքը, որ ընտրական գործընթացն ի սկզբանե եղել է ոչ ազատ և անարդար, ինչպես նաև տեղ են գտել խախտումներ, Ազգային խորհուրդը հայտարարում է, որ ընտրությունները չեն արտացոլում ժողովրդի կամքը և ամբողջությամբ կեղծված են:
Ազգային խորհուրդը ադրբեջանցի ժողովրդին և միջազգային հանրությանը կոչ է անում չընդունել ընտրությունների արդյունքները: Ժողովրդավարական ուժերի Ազգային խորհուրդը կարծում է, որ միջազգային հանրությունը ևս պետք է կատարի իր պարտավորությունները և լուրջ ճնշում գործադրի Ադրբեջանի կառավարության վրա՝ ստիպելով հրաժարվել ավտորիտար կառավարումից:
Պատրաստեց՝ Վիկտորյա ԱՆԴՐԵԱՍՅԱՆԸ
