Ռուսաստանի և Բելառուսի նախագահներ Վլադիմիր Պուտինը և Ալեքսանդր Լուկաշենկոն Սոչիում անցկացված բանակցություններում չեն կարողացել պայմանավորվածություն ձեռք բերել ռուսական նավթի զեղչի հարցով: Ինչպես հաղորդում է BBC-ն, ՌԴ նախագահի վարչակազմի ղեկավարի տեղակալ Դմիտրի Կոզակը հայտարարել է, որ նավթի գինը Մինսկի համար կմնա շուկայական:
Ռուսաստանը դադարեցրել է նավթի մատակարարումը Բելառուս 2020թ. սկզբին, իսկ գազի մատակարարման պայմանագիրն ավարտվում է փետրվարի վերջին: Լուկաշենկոն ավելի վաղ Մոսկվային մեղադրել է վառելիքի գների բարձրացման և քաղաքական ճնշում կիրառելու համար:
Կոզակը նաև նշել է, որ Բելառուսի կառավարությունը մատակարարումների մասին պետք է բանակցի ռուսական նավթային ընկերությունների հետ, իսկ Ռուսաստանի իշխանությունները պատրաստ են աջակցել այդ բանակցություններին: «Եթե զեղչեր տրամադրվեն, ստիպված կլինենք պետական կարգավորում սահմանել այս ոլորտում, ինչը չենք կարող անել, չենք կարող մշտապես փոխել խաղի կանոնները՝ անհասկանալի դրության մեջ դնելով նավթային ընկերություններին»,-ասել է Կոզակը:
Նա նաև հաղորդել է, որ Ռուսաստանը Բելառուս գազ կմատակարարի 2019թ.-ի պայմաններով: Բելառուսական կողմի ներկայացուցիչներն առայժմ չեն մեկնաբանել բանակցությունների արդյունքները:
Կարդացեք նաև
Մինսկի համար ռուսական նավթի թանկացման պատճառը նավթային ոլորտում Ռուսաստանի կողմից հարկային մանևրումն է: Վերջին տարիներին Ռուսաստանի իշխանությունները իրականացնում են այդ բարեփոխումը: Փաստացի, բարեփոխումը նախատեսում է արտահանման մաքսի նվազեցում՝ մինչ զրո, բայց միևնույն ժամանակ բարձրացվում է օգտակար հանածոների հարկը: Նախկինում Ռուսաստանը բելառուսական կողմին նավթ մատակարարում էր առանց մաքսատուրքերի: Բելառուսը 2020թ. սկզբից նավթի դեֆիցիտ ունի և փնտրում է այլընտրանքային ուղիներ:
Ուշագրավ է, որ վերջերս Մինսկը անակնկալ առաջարկ է ստացել ԱՄՆ-ից: Պետքարտուղար Մայքլ Պոմպեոն փետրվարի սկզբին Մինսկ կատարած այցի ընթացքում հայտարարել է, որ Միացյալ Նահանգները պատրաստ է Բելառուսին ապահովել նավթով 100% մրցունակ գներով: Միևնույն ժամանակ ամերիկացի բարձրաստիճան պաշտոնյան ասել է, որ Բելառուսը պետք է մի շարք պայմաններ կատարի, այդ թվում՝ անդամակցի Առևտրի համաշխարհային կազմակերպությանը:
Պատրաստեց՝ Վիկտորյա ԱՆԴՐԵԱՍՅԱՆԸ
