Ինչպես տեղեկացրել ենք, «Արփի լիճ ազգային պարկ» ՊՈԱԿ-ի նախկին փոխտնօրեն, որոշ ժամանակ տնօրենի ժ/պ աշխատած դաշնակցական Գևորգ Ալեքյանի խափանման միջոցը փոխվել է․ նա կալանավորումից ազատ է արձակվել 5 միլիոն դրամ գրավի դիմաց։ Նրան մեղադրանք է առաջադրվել ՀՀ Քրեական օրենսգրքի 311 հոդվածի հատկանիշներով` 11 դրվագ` տարբեր չափերի կաշառք ստանալու փաստով:
Շիրակի մարզի դատախազ Կարեն Գաբրիելյանն Aravot.am-ի հետ զրույցում հայտնեց, որ դատախազությունն այսօր ստացել է կալանքը գրավով փոխարինելու դատական ակտը, պատրաստվում են սեղմ ժամկետում բողոք ներկայացնել Վերաքննիչ քրեական դատարան։
«Մենք այսօր ստացել ենք «Արփի լիճ ազգային պարկ» ՊՈԱԿ-ի նախկին տնօրենի պաշտոնակատարի վերաբերյալ դատարանի որոշումը՝ կալանքը գրավով փոխարինելու վերաբերյալ։ Նշված դատական ակտը ուսումնասիրվել է մեր կողմից, ինչի արդյունքում գտել ենք, որ այն հիմնազուրկ է, չի բխում կալանք կիրառելու ՀՀ օրենսդրության կանոններից և Վճռաբեկ դատարանին վերաբերելի որոշումներից, հետևաբար արդեն իսկ նախապատրաստում ենք վերաքննիչ բողոք, ինչը Վերաքննիչ քրեական դատարան կմուտքագրվի ամենասեղմ ժամկետում՝ մոտ օրերս»,-հայտնեց դատախազը։
Նունե ԱՐԵՎՇԱՏՅԱՆ
