Եվրոպայի խորհրդի խորհրդարանական վեհաժողովը Հայաստանի իշխանություններին կոչ է անում դիմել Վենետիկի հանձնաժողով՝ սահմանադրական և հարակից փոփոխությունների հարցով: Այս մասին ասվում է ԵԽԽՎ-ի Հայաստանի հարցով համազեկուցողների հաղորդագրությունում:
Հաղորդագրության մեջ նշված է, որ Հայաստանի խորհրդարանը փետրվարի 6-ին արտահերթ նիստ անցկացնելու որոշում է կայացրել՝ սահմանադրական օրենքում լրացումներ և փոփոխություններ կատարելու մասին նախագծերը քննարկելու համար, որոնք հնարավորություն կտան սահմանադրական փոփոխությամբ դադարեցնել ՍԴ նախագահի և անդամների պաշտոնավարումը:
«Այս թեմաները կարևոր են, առաջարկվող փոփոխությունները կարող են երկարաժամկետ հետևանքներ ունենալ սահմանադրական ինստիտուտների գործունեության վրա։ Այս համատեքստում, հաշվի առնելով բարձրացված մի շարք հարցեր, ՀՀ իշխանություններին կոչ ենք անում կարծիք ստանալու համար հնարավորինս շուտ դիմել Վենետիկի հանձնաժողով՝ որպես Եվրախորհրդի սահմանադրական իրավունքի փորձագիտական մարմին: Հավատացած ենք, որ այս կարծիքը, որը հնարավոր կլինի արագ ստանալ հրատապ ընթացակարգով, արժեքավոր կլինի շահագրգիռ բոլոր կողմերի, այդ թվում հայ ընտրազանգվածի համար՝ հանրաքվեի անցկացման պարագայում »,- ասվում է հաղորդագրության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
