«Այդ թվում տեխնիկական սխալներով նախագիծը հետ կանչելը նորմալ ընթացակարգ է: Սխալը կարող է վերաբերել ժամկետին, ստորակետին, բութին, նորմատիվ իրավական ակտերի մասին օրենքի պահանջներին եւ այլն»,-լրագրողների հետ զրույցում այսօր ասաց «Իմ քայլը« խմբակցության պատգամավոր, ԱԺ պետաիրավական հարցերի հանձնաժողովի նախագահ Վլադիմիր Վարդանյանը՝ պարզաբանելով, թե ինչու է այսօրվա արտահերթ նիստը հետաձգվել:
Հիշեցնենք՝ նիստը հետաձգվելուց հետո հրավիրվեց ԱԺ խորհրդի նիստ, ինչի արդյունքում ԱԺ արտահերթ նիստի օրակարգում ավելի վաղ ներառված երեք հարցերից մնաց միայն մեկը՝ Սահմանադրության 213-րդ հոդվածի փոփոխությանն առնչվող օրինագիծը:
Հիշեցնենք, որ խոսքը այն նախագծի մասին է, որով «Իմ քայլն» առաջարկում է չեղյալ համարել Սահմանադրության 213 հոդվածը, որի արդյունքում կդադարեցվեն ՍԴ դատավորների, բացառությամբ Վահե Գրիգորյանի եւ Արման Դիլանյանի, լիազորությունները:
«Հակասահմանադրական ընթացակարգեր օրինագծում չկան: Նման լրջագույն խնդիրներ, որոնք կարող են կապված լինել Սահմանադրության այս կամ այն նորմի հետ, չկան: Բովանդակությանը ծանոթ եմ: Որեւէ ընթացակարգ չի խախտվել»,-նշեց Վլադիմիր Վարդանյանը:
Կարդացեք նաև
Հավելենք, որ ԱԺ արտահերթ նիստում այժմ քննարկվում է ՍԴ դատավորներին վերաբերող նշյալ օրինագիծը, որի զեկուցողը «Իմ քայլի» պատգամավոր Վահագն Հովակիմյանն է: Նա լրագրողների հարցերին պատասխանել խուսափում է:
Լուիզա ՍՈՒՔԻԱՍՅԱՆ
