ՀՀ սահմանադրական փոփոխությունների նախագծի առաջին ընթերցման օրակարգով ԱԺ-ն կրկին արտահերթ նիստ է հրավիրել: Հիշեցնենք, որ նիստը պետք է կայանար առավոտյան ժամը 11-ին, բայց նախաձեռնողները օրակարգի նախագիծը հետ էին վերցրել ու նոր արտահերթ հրավիրել:
«Լուսավոր Հայաստան» խմբակցության ղեկավար Էդմոն Մարուքյանն ասաց, որ գլխադասային պետաիրավական հարցերի հանձնաժողովը չի տվել իր եզրակացությունը հատուկ ընթացակարգի վերաբերյալ, ինչը «ԱԺ կանոնակարգ» օրենքի խախտում է ու բացթողում: ԱԺ նախագահ Արարատ Միրզոյանը պատասխանեց. «Մեր կանոնակարգ օրենքը նախատեսում է դեպքեր, երբ հնարավոր է նիստն անցկացնել առանց գլխադասային հանձնաժողովի եզրակացության»:
ԲՀԿ պատգամավոր Միքայել Մելքումյանն էլ շեշտեց, որ «ԱԺ կանոնակարգ» օրենքի 85_րդ հոդվածը սահմանում է սահմանադրական փոփոխությունների նախագիծը շրջանառության մեջ դնելու կարգը, որով ասվում է, որ գրությունը ստանալուց հետո 3 աշխատանքային օրվա ընթացքում ԱԺ նախագահը նշանակում է գլխադասային հանձնաժողով ու աշխատակարգով սահմանված կարգով դնում է շրջանառության մեջ, սա սովորական օրենքների ռեժիմով չի:
Միրզոյանն էլ արձագանքեց. «Ես դա այսօր առավոտյան արել եմ, ապահովել եմ»: Օրակարգին եւ նիստի տեւողությանը ընդդիմադիր խմբակցությունները դեմ քվեարկեցին, բայց 85 «կողմ» ձայներով այն ընդունվեց:
Կարդացեք նաև
Մարուքյանը նորից արձագանքեց, որ օրենքի խախտումներով այսպիսի կարեւոր նախագիծը բերելը ապալեգիտիմացնում է ողջ գործընթացը: Միրզոյանը պատասխանեց, որ ինքը գլխադասային հանձնաժողով նշանակել է, պարզապես պետաիրավականը չի հասցրել նիստ անել, որովհետեւ արտահերթն ավելի շուտ է նշանակվել:
ԲՀԿ-ն 20 րոպե ընդմիջում հայտարարեց: Իսկ ընդմիջումից հետո «Իմ քայլի» պատգամավոր Վահագն Հովակիմյանը սկսեց զեկուցել նախագիծը:
Մանրամասները՝ ավելի ուշ:
Հռիփսիմե ՋԵԲԵՋՅԱՆ
