ԱԱԾ նախկին տնօրենը՝ քաղաքականություն մտնելու, Ռոբերտ Քոչարյանի կալանքի, Նիկոլ Փաշինյանի հետ տարաձայնությունների, իր՝ նախկինների հետ կապերի եւ այլ հարցերի մասին:
«Այսօր ես հայտարարելու եմ իմ՝ ակտիվ քաղաքականությամբ զբաղվելու մասին եւ փորձելու եմ ինձ ներկայացնել արդեն քաղաքական դաշտում»,- տպագիր լրատվամիջոցների գլխավոր խմբագիրների հետ հանդիպմանը երեկ հայտարարեց ՀՀ Ազգային անվտանգության ծառայության (ԱԱԾ) նախկին տնօրեն Արթուր Վանեցյանը:
Նա հայտնեց, որ առաջիկայում կգրանցեն քաղաքական կուսակցություն, արդեն իրականացնում են քաղաքական խորհրդատվություններ: Արթուր Վանեցյանն ասաց, որ չի կարող անուններ տալ, թե ովքեր են իրենց կուսակցության մեջ լինելու ու փոխանցեց, որ կուսակցությունը լինելու է աջ կենտրոնամետ ուղղվածության:
Հարցին՝ Ձեր մուտքը պահանջվա՞ծ է այսօր քաղաքական դաշտում, Արթուր Վանեցյանը պատասխանեց. «Այսօր անհրաժեշտություն կա, որ ձեւավորվի մի քաղաքական ուժ, որը կփորձի համախմբել հասարակության այն լայն զանգվածը, որը դժգոհ է իշխանություններից, եւ նրանց հույսերը չեն արդարացել: Նրանք մարդիկ են, որոնք չեն ուզում վերադարձ անցյալին: Հասարակությանը սեւերի ու սպիտակների բաժանելը կեղծ օրակարգ է, որը բերվել է քաղաքական դաշտ, թե իբր գործող իշխանությունների այլընտրանքը նախկիններն են: Վերադարձ անցյալին երբեք չի լինելու, ես այն մարդն եմ, որ պայքարելու եմ դրա դեմ: Նման բան չկա»:
Կարդացեք նաև
Հիշեցմանը՝ իր հրաժարականի տեքստում խոսում էր վտանգներից, ի՞նչ վտանգների մասին է խոսքը, Արթուր Վանեցյանը պատասխանեց. «Բոլոր այն մարդիկ, որոնք կարողանում են մի քանի քայլ առաջ տեսնել ու հասկանալ, գիտակցում են, թե ինչ է կատարվում այսօր մեր երկրում: Չբարձրաձայնել դրա մասին՝ կլիներ սխալ, հատկապես մի մարդու կողմից, որը տարիուկես զբաղեցրել է ԱԱԾ տնօրենի պաշտոնը եւ վերջին քսան տարին աշխատել է ԱԱԾ-ում: Ստացվող տեղեկությունների վերլուծությունը հանգեցրել է նրան, որ այն, ինչ տեղի է ունենում այսօր ՀՀ-ում, սկսվել է հինգ-վեց ամիս առաջ: Ես կանխատեսել էի, որ հետեւանքները Հայաստանի համար լինելու են ոչ բարենպաստ: Այսօր այդ վտանգներն ի հայտ են գալիս: Որպես օրինակ բերենք եվրոպական կառույցների վերջին երկու կոշտ գնահատականները մեր երկրի մասին»:
Պետական հեղաշրջման մեղադրանքի մասին
Իրեն պետական հեղաշրջման մեջ մեղադրելու մասին Արթուր Վանեցյանն ասաց. «ԱԱԽ նախագահն է այդ մասին հայտարարում, պատգամավորները պնդում են, իսկ ԱԱԾ-ն նշում է, որ նման փորձ չի եղել: Դրանից հետո Նիկոլ Փաշինյանը հայտարարում է, թե մենք տենց չենք ասել, մենք ասել ենք, որ դա հիբրիդային հեղաշրջում է: Մի տերմին, որը օգտագործվել է Ուկրաինայում: Դա անլրջություն է: Պետական հեղաշրջման փորձ իրականացնող մարդը պետք է նստած լիներ համապատասխան վայրում: Ես նման ցանկություն չեմ ունեցել, ընդհակառակը, վստահ եմ՝ ցանկացած մարդ, որը կփորձի իրականացնել պետական հեղաշրջում կամ հակասահմանադրական ճանապարհով կփորձի տիրանալ իշխանության, այդ մարդը պետք է դատապարտվի եւ կրի իր պատիժը»:
Հարցին՝ Նիկոլ Փաշինյանը սահմանադրական ճանապարհո՞վ տիրացավ իշխանությանը, Արթուր Վանեցյանը պատասխանեց. «2018-ի ապրիլ-մայիսին այն, ինչ տեղի ունեցավ ՀՀ-ում, աննախադեպ էր: Ժողովրդի մեծամասնությունը փոփոխությունների ակնկալիքով եւ պահանջով դուրս եկավ փողոցներ: Ես, լինելով ԱԱԾ աշխատակից, կարող եմ հավաստիացնել, որ անգամ պետական կառույցներում մարդիկ սպասում էին փոփոխությունների, եւ դրանք եղան: Հետագայում եղան զարգացումներ, եւ մենք ունեցանք այն, ինչ այսօր ունենք: Համաձայն չեմ այն պնդմանը, որ դա հակասահմանադրական էր, քանի որ եղել է ժողովրդական պահանջ: Այն, թե ինչ եղավ հետո, դա արդեն խորը վերլուծության եւ զրույցի թեմա է, որի մասին մի օր առանձին կխոսենք»:
«Առավոտի» հարցին՝ «Հայկական ժամանակ», «Ժամանակ», «Չորրորդ իշխանություն» թերթերի գլխավոր խմբագիրները հրավիրվա՞ծ էին հանդիպմանը, Արթուր Վանեցյանը պատասխանեց, որ երկու օր առաջ կապվել է ՀԺ ներկայացուցչի հետ՝ SMS հաղորդագրությամբ, ասել, որ գլխավոր խմբագիրների հետ են նման հանդիպում նախաձեռնել, այդ անձն ասել է, որ գլխավոր խմբագիրն Աննա Հակոբյանն է: Հետո Վանեցյանը մի բան էլ է գրել, ինչը մնացել է անպատասխան: «Ժամանակ» թերթի գլխավոր խմբագիրը SMS-ը, ըստ Վանեցյանի, տեսել է, բայց չի պատասխանել, իսկ ՉԻ թերթի գլխավոր խմբագիր Շողեր Մաթեւոսյանն ասել է՝ հնարավոր է գա, հնարավոր է ոչ, հետո կփորձեն հարցազրույց անել:
Արթուր Վանեցյանի եւ Նիկոլ Փաշինյանի տարաձայնությունների մասին
Խոսելով իր եւ Նիկոլ Փաշինյանի միջեւ եղած տարաձայնությունների մասին՝ Արթուր Վանեցյանն ասաց, որ դրանք եղել են քաղաքացու, հասարակության եւ պետության ընկալումների հետ կապված. «Նիկոլ Փաշինյանին հրաժարականիցս առաջ, առավել եւս հետո, ոչինչ պարտք չեմ, ես կատարել եմ իմ աշխատանքը, արել եմ ամեն ինչ, որ հեղափոխության ժամանակ հասարակությանը տրված խոստումները իրականանան: Ես չեմ ափսոսել իմ՝ հրաժարական ներկայացնելու համար, այլ ափսոսում եմ նրա համար, որ մենք չենք կարողացել արդարացնել բազմահազար մարդկանց հույսերը»: Արդյոք չի՞ վախենում դավաճան կոչվելուց, Արթուր Վանեցյանը պատասխանեց. «Դավաճան կոչվելու գնահատականներից թող վախենան նրանք, որոնք դավաճանել են հեղափոխության գաղափարներին: Թող դավաճան պիտակավորումից վախենան նրանք, ովքեր իրենց անձնական շահը վեր դասեցին հանրայինից: Թող դավաճան պիտակավորումից վախենան նրանք, ովքեր շատ կարճ ժամանակ հետո սթափվելու են եւ ասելու, թե չենք հասկացել ինչ ենք անում»: «Առավոտի» հարցին՝ անուններ կտա՞ք, Արթուր Վանեցյանն ասաց՝ անուններ չեմ տա, բայց խոսքը վերաբերում է այն շրջանակին, որն այսօր իշխանության մեջ է:
Հարցին՝ ովքե՞ր էին տվել հանձնարարություն պլանավորել եւ իրականացնել «տուշոնկա շոուն» եւ Ռոբերտ Քոչարյանի կալանքի օպերացիան, Արթուր Վանեցյանը պատասխանեց, թե չի կիսում այդ գնահատականը եւ պարզաբանեց. «ԱԱԾ-ն իրականացրել է լայնածավալ օպերատիվ հետախուզական միջոցառումներ եւ բացահայտել կոնկրետ հանցագործություններ: Թե հետագայում ինչ գնահատականներ տրվեցին այդ ամենին, դրա պատասխանատուն ես չեմ: Այն, ինչ ներկայացված է ԱԱԾ տարածած տեսանյութի մեջ, ամբողջությամբ համապատասխանում է իրականությանը: Քննությունն իրականացվում է ՀՔԾ-ում: Այսօր ընթանում է դատաքննություն, եւ բոլոր ապացույցները հանրությանը դառնալու են հասանելի»:
Ռոբերտ Քոչարյանի կալանքի եւ մարտի 1-ի գործի մասին
Ռոբերտ Քոչարյանի գործի մասին խոսելով՝ Արթուր Վանեցյանն ուղղում մտցրեց, որ խոսքը մարտի 1-ի գործի բացահայտման մասին է, եւ նշեց, որ առաջնահերթությունը պետք է տրվի տասը մարդու սպանության բացահայտմանը, եւ հարց է՝ արդյոք այսօրվա քննությունը նպաստո՞ւմ է դրան, թե՞ ոչ. «Կարծում եմ՝ ոչ: Գիտեմ, որ իմ այս հայտարարությունից հետո լինելու են տարբեր մեկնաբանություններ: Ուզում եմ նշել, որ Ռոբերտ Քոչարյանի խափանման միջոց կալանավորումը ընտրված է սխալ, եւ նա երբեւիցե իր որեւէ քայլով ցույց չի տվել, որ խուսափում է քննությունից: Ճիշտ կլիներ Ռոբերտ Քոչարյանի խափանման միջոցը վերանայվեր, դա կթուլացներ հասարակական որոշ շրջանակներում լարվածությունը եւ միայն կնպաստեր գործի լիարժեք քննությանը եւ բացահայտմանը»:
Արթուր Վանեցյանը՝ «իջեցված» հանձնարարականների մասին
Գլխավոր խմբագիրները խնդրեցին փակագծեր բացել՝ ինչպե՞ս է աշխատել ԱԱԾ-ն, ի՞նչ հարաբերություն է ունեցել վարչապետի ու կառավարության հետ, ի՞նչ հանձնարարականներ են իջեցվել՝ այդ թվում անօրինական, ԱԱԾ նախկին պետը պատասխանեց. «20 տարվա օպեր աշխատողի ստաժ ունեցող մարդը, սպան, գեներալը երբեք չի պատմի իր անձնական եւ աշխատանքային զրույցների մասին վարչապետի հետ: Բայց, այնուամենայնիվ, նշեմ, որ բազմիցս վարչապետը հրապարակայնորեն տվել է մեզ այնպիսի հանձնարարականներ, որոնք ուղղակի կատարման ենթակա չեն: Կառավարության նիստին ասում էր՝ հանձնարարում եմ ԱԱԾ-ին ստուգել գազալցակայանների ՀԴՄ կտրոնները: Հանձնարարում եմ ԱԱԾ-ին տեղորոշել սեւազգեստ մարդկանց, որոնք զինված շրջում են քաղաքում: Ի՞նչ սեւազգեստ, ի՞նչ զինված մարդիկ: Վերջին զարգացումները ցույց տվեցին, որ կան հորինված կերպարներ, որոնք իբր ահաբեկում են ժողովրդին: Նման ցածր մակարդակի է իջեցվում իրավապահ համակարգի գործունեությունը: Ծիծաղում են՝ մարդուն բերման են ենթարկում, եւ նա դուրս է գալիս ու սկսում է ծիծաղել: Խորհրդային միության տարիներին ասում էին ով խելոք չի պահում իրեն՝ 15 «սուտկա» են տալիս: Հիմա ով իշխանությանը դեմ է խոսում, խելոք չի պահում, թող 15 «սուտկա» տան, գոնե կասենք՝ մի օրենք են ընդունել: Ի՞նչ է նշանակում մարդը ամբողջ օրը ոստիկանության դիմաց կանգնում է, գնում, հասնում է տուն, թեւերը ոլորում են, բերում ոստիկանություն, կես ժամ հետո բաց թողնում»:
Հարցին՝ չե՞ք կարծում, որ Ձեր նկատմամբ նման քայլեր կկատարվեն, Արթուր Վանեցյանն ի պատասխան հայտնեց, որ իրեն հրավիրել են Քննչական կոմիտե գաղտնալսման գործով որպես վկա հարցաքննվելու, նաեւ ՀՖՖ նախկին նախագահ Ռուբեն Հայրապետյանի դեմ հարուցված քրեական գործի շրջանակներում է ցուցմունք տվել:
«Առավոտի» հարցին՝ երբ վարչապետը Ձեր կարծիքով անհեթեթ հրամաններ էր տալիս, Դուք ի՞նչ էիք ասում՝ есть, հա՞, Արթուր Վանեցյանը պատասխանեց. «Եթե ասեի՝ есть, մինչեւ այսօր կշարունակեի մնալ ԱԱԾ տնօրեն, կլինեի բոլորի կողմից սիրված Վանեցյանը, ֆեյսբուքի թիվ մեկ սիրված հերոսը եւ չէի գնա… ես իմ ողջ ծառայության ընթացքում որեւէ անօրինական հրաման չեմ կատարել: Թե ինչպես չեմ կատարել եւ շարունակել եմ պաշտոնավարել, այդ հարցի հասցեատերը ես չեմ. խնդրում եմ այդ հարցով դիմեք Նիկոլ Փաշինյանին»:
Արթուր Վանեցյանն ասաց, որ իր ազատման առաջին դիմումը եղել է գաղտնալսումից անմիջապես հետո, եւս մեկ անգամ՝ աշխատելու ընթացքում եւ այս վերջինը:
Արթուր Վանեցյանը՝ իր եւ Նիկոլ Փաշինյանի ծանոթության մասին
Արթուր Վանեցյանն ասաց, որ Նիկոլ Փաշինյանին ճանաչել է Ալեն Սիմոնյանի միջոցով. «Ինչպես վերջերս Ալեն Սիմոնյանը պատմեց՝ ինքն է ներկայացրել իմ թեկնածությունը Նիկոլ Փաշինյանին: 2018-ին ես եղել եմ ԱԱԾ գործող սպա, եւ գործող սպայի աշխատանքի գործառույթներից չի բխում մասնակցություն ունենալ որեւէ քաղաքական գործընթացի»:
Հարցին՝ Իջեւանում ծառահատումների ժամանակ իր ցուցաբերած ակտիվությունը կարո՞ղ է օգտագործվել որպես իր դեմ կոմպրոմատ, նա պատասխանեց. «Եթե ես չգնայի Իջեւան, կարող էինք ունենալ բախումներ ոստիկանական ուժերի ու քաղաքացիների միջեւ, քանի որ որոշվել է այս երկրում, որ ճանապարհ փակելու, բողոքելու եւ բողոքի ձայն բարձրացնելու հարցում կա մենաշնորհ, եւ դրանից օգտվում են ոմանք: Ով խախտում է՝ պետք է շատ կոշտ արձագանքի արժանանա: Դա է եղել պատճառը, որ գնացել եմ Իջեւան: Ինձ վրա կոմպրոմատներ լինել չեն կարող, քանի որ չեմ արել մի բան, որից կարող եմ ամաչել»:
Արթուր Վանեցյանը՝ Սերժ Սարգսյանի, Ռոբերտ Քոչարյանի, Միքայել Մինասյանի եւ այլոց հետ իր կապերի մասին
«Սերժ Սարգսյանին եւ Ռոբերտ Քոչարյանին անձամբ չեմ ճանաչում, Միքայել Մինասյանին ճանաչում եմ շատ վաղուց, քանի որ բոլոր նրանք, ովքեր ծնվել են Երեւանում ու գնացել են դպրոց, շփվել են իրար հետ: Այո, նրան ճանաչում եմ, ընկերներ չենք եղել, ունեցել ենք նորմալ շփումներ: Վերջին անգամ նրան հանդիպել եմ ԱԱԾ-ում՝ ԱԱԾ տնօրեն եղած ժամանակ՝ Նիկոլ Փաշինյանի գիտությամբ եւ հանձնարարությամբ: Հանձնարարության բովանդակության մասին գիտեն երեք հոգի՝ ես եւ եւս երկու հոգի, որոնք այսօր իմ քաղաքական թիմից չեն: Մնացած հարցերով խնդրում եմ դիմեք նրանց: Ռամզան Քադիրովի հետ ունեցել եմ շփումներ, որոնց մասին պատմել չեմ ուզում, որպեսզի չվտանգեմ այն հնարավոր ծրագրերը, որոնք պետք է իրականանան մեր երկրի համար»,-ասաց նա:
Գաղտնալսման հայտնի գործի մասին
Գաղտնալսման գործի մասին ասաց, որ դա մի քանի խոսակցությունների մոնտաժված տարբերակ է. «Այդ գաղտնալսումը ներկայացված է այնպես, որ տպավորություն ստեղծվի, որ ես ազդեցություն եմ ունեցել դատական իշխանության, դատավորների վրա»: Հարցին՝ Նիկոլ Փաշինյանի կողմից կոնկրետ հանձնարարականներ եղե՞լ են Սերժ Սարգսյանի, Ռոբերտ Քոչարյանի, Հրայր Թովմասյանի, Միքայել Մինասյանի վերաբերյալ, Արթուր Վանեցյանը պատասխանեց. «Հանձնարարականը եղել է հետեւյալը՝ անկախ նախկինում եւ ներկայումս զբաղեցրած դիրքի, բոլոր նրանք, ովքեր ՀՀ օրենքները խախտել են, պետք է ենթարկվեն պատասխանատվության: Ես ի պաշտոնե կատարել եմ իմ վրա դրված խնդիրները եւ տեղյակ եք, թե քանի մարդ է ենթարկվել քրեական պատասխանատվության»:
Արթուր Վանեցյանն ասաց, որ Հրայր Թովմասյանի հետ ծանոթ է այն պատճառով, որ վերջինիս որդին խաղում էր 14 տարեկանների հավաքականում: Հարցին՝ կոնկրետ հանձնարարական Հրայր Թովմասյանի հետ կապված եղե՞լ է, Արթուր Վանեցյանը պատասխանեց. «Հանձնարարականներ եղել են բոլորի նկատմամբ: Արդեն իսկ իշխանությունները չեն թաքցնում, որ իրենք չեն հանդուրժելու Հրայր Թովմասյանի՝ ՍԴ նախագահ լինելու հանգամանքը: Այն զարգացումները, որ եղան ՍԴ շուրջ վերջին շրջանում, ես չէի կարող ուղղակի լինել մասնակից նման զարգացումների: Ինձ ուղիղ հանձնարարական չի եղել: Իմ՝ հրաժարական ներկայացնելու հիմնական պատճառներից մեկը եղել է այդ հարցում անհամաձայնությունը, եւ ես հնչեցրել եմ կանգ առնելու սթափեցնող կոչը»:
Արթուր Վանեցյանը՝ իր ստեղծած հիմնադրամի մասին
Արթուր Վանեցյանը նաեւ հայտնեց, որ ստեղծել է «Հայրենիք» զարգացման հիմնադրամը, քանի որ կարեւորում է քաղհասարակության դերը: Ըստ նրա՝ հեղափոխությունից հետո ՀԿ դաշտը մնաց դատարկ: Արթուր Վանեցյանը մտահոգություն հայտնեց, որ ՀԿ-ները հիմնականում դրսից են ֆինանսավորվում: Իսկ իրենց գումարներ են հատկացնելու սփյուռքի հայրենակիցները՝ ՌԴ-ից, ԱՄՆ-ից, Եվրոպայից: Նա նաեւ շեշտեց, որ հիմնադրամը բարեգործական չէ, բայց հիմնադրամի տարածքում լինելու է մեդիա հաբ, որտեղ անվճար կարող են մամուլի ասուլիսներ կազմակերպվել, կլինեն աշխատասենյակներ: «Առավոտի» հարցին՝ բայց սփյուռքից ներդրումները չեղա՞վ, որ դրսից, այսինքն, ասենք՝ ռուսահայ գործարարներից է ֆինանսավորվում իրենց հիմնադրամը, Արթուր Վանեցյանն արձագանքեց. «Խոսքը նաեւ ԱՄՆ-ում, Եվրոպայում բնակվող մեր հայրենակիցների մասին է, ինչպես նաեւ ՌԴ-ում բնակվող մեր հայրենակիցների մասին: Ֆինանսավորումը ոչ թե դրսից է, այլ ֆինանսավորողները ազգությամբ հայեր են»:
Պատրաստեց
Տաթև ՀԱՐՈՒԹՅՈՒՆՅԱՆԸ
«Առավոտ» օրաթերթ
06.02.2020
