Այսօր ԱԺ արտահերթ նիստ էր հրավիրվել, որի օրակարգում էր իմքայլական 37 պատգամավորների համահեղինակությամբ աղմկահարույց նախագիծը: Սակայն ԱԺ նախագահ Արարատ Միրզոյանը նիստի մեկնարկին հայտարարեց, որ արտահերթ նիստը չի կայանա, քանի որ նախաձեռնողը հետ է կանչել նախագիծը: Հիշեցնենք, որ խոսքը այն նախագծի մասին է, որով առաջարկում էին չեղյալ համարել Սահմանադրության 213 հոդվածը, որի արդյունքում կդադարեցվեն ՍԴ դատավորների, բացառությամբ Վահե Գրիգորյանի եւ Արման Դիլանյանի, լիազորությունները:
Երեկ ԱԺ խորհրդի նիստում «Լուսավոր Հայաստան» եւ ԲՀԿ խմբակցությունները դեմ էին քվեարկել այդ օրակարգին:
Այսօր արտահերթ նիստի սկզբում Արարատ Միրզոյանն ասաց, որ ըստ երեւույթին, ինչ-որ տեխնիկական խնդիրների պատճառով են նախագծերը հետ կանչվել, այսօր առավոտյան նախաձեռնողը համանման, ոչ բովանդակային փոփոխություններով օրենքի նախագիծ է դրել շրջանառության մեջ եւ «Իմ քայլը» խմբակցությունը կրկին ստորագրություն է հավաքել՝ արտահերթ նիստ անելու:
Միրզոյանը տեղեկացրեց, որ հիմա ԱԺ խորհրդի արտահերթ նիստ են անելու, որից հետո կորոշվի այսօր արտահերթ նիստն անցկացնել: Նա պատգամավորներին հորդորեց այսօր մնալ ԱԺ շենքում:
Կարդացեք նաև
Հռիփսիմե ՋԵԲԵՋՅԱՆ
