Օրերս հետաձգված Ազգային ժողովի խորհրդի նիստը, որի ժամանակ պետք է քննարկվեր Սահմանադրական դատարանի ճգնաժամի լուծմանն ուղղված «Իմ քայլը» խմբակցության օրինագիծը, տեղի կունենա այսօր՝ 16:00-ին: Այս մասին այսօր լրագրողների հետ ճեպազրույցում հայտարարեց ԱԺ փոխնախագահ Ալեն Սիմոնյանը: «Լինելու է արտահերթ նիստ: Այսօրվա խորհրդի նիստի ժամանակ կքննարկենք: Օրինագծում ոչ մի փոփոխություն, բացի տեխնիկականից, թեթեւակի շտկումից չի եղել: Հետաձգման պատճառը դա է: Եթե կարծում եք, որ հետաձգվել է, որ ուրիշ բան բերվի, ինչ-որ բան փոխվի, ոչ: Զուտ տեխնիկական փոփոխություն է»:
https://www.facebook.com/aravot.am/videos/746932945831499/
Ինչ վերաբերում է տեղեկություններին, որ «Իմ քայլը» պետք է ՍԴ-ին առնչվող օրինագծի շուրջ ԵԽ Վենետիկի հանձնաժողովի հետ խորհրդակցեր, եւ դա է եղել հետաձգման պատճառը, Ալեն Սիմոնյանն ասաց՝ չեմ կարծում, որ ԱԺ պատգամավորը Վենետիկի հանձնաժողովի հետ պետք է խորհրդակցի: Ալեն Սիմոնյանը նաեւ վստահեցրեց, որ շատ շուտով դատական համակարգն ազատագրվելու է նախկին իշխանության զավթումից:
Լուիզա ՍՈՒՔԻԱՍՅԱՆ
