«Արցախի ազատություն» կուսակցության Գործադիր մարմինը որոշում է կայացրել սպասվող նախագահական ընտրություններին սատարելու Արայիկ Հարությունյանին, իսկ խորհրդարանականին՝ միավորվել «Ազատ հայրենիք» կուսակցության կողմից ձևավորվող քաղաքական դաշինքի շուրջ:
Այս առթիվ Արցախի Հանրապետության նախագահի թեկնածու, «Ազատ հայրենիք» կուսակցության ղեկավար Արայիկ Հարությունյանը՝ «Ֆեյսբուք»-ի իր էջում գրել է «Համապետական ընտրություններին ընդառաջ՝ «Ազատ հայրենիք» կուսակցության կողմից ձևավորվող դաշինքի շուրջ ուժերը միավորեց նաև «Արցախի ազատություն» կուսակցությունը: Հիմնականում երիտասարդների ներուժի հիման վրա կազմավորված նորաստեղծ քաղաքական միավորը լավ է պատկերացնում մեր երկրի առջև ծառացած ներքին և արտաքին մարտահրավերները և քաջ գիտակցում դրանք միասնաբար հաղթահարելու անհրաժեշտությունը:
Ինձ մնում է միայն շնորհակալություն հայտնել անվերապահ վստահության համար և մեկ անգամ ևս հավաստել՝ միասին կարող ենք»:
Հիշեցնենք, որ Արայիկ Հարությունյանի թեկնածությունը պաշտպանելու և նրա ղեկավարած քաղաքական ուժի շուրջ համախմբվելու համար ավելի վաղ հայտարարություն են արել նաև «Արցախ հանրապետական» և «Քաղաքացիական միացյալ դաշինք» կուսակցությունները:
Կարդացեք նաև
«Ազատ հայրենիք» կուսակցության մամուլի կենտրոն
