Ռուբեն Հայրապետյանի շահերի ներկայացուցիչ փաստաբան Ամրամ Մակինյանը ոստիկանությունում իր պաշտպանյալի նկատմամբ կատարված գործողությունների մասին լրագրողներին ասաց. «Պարոն Հայրապետյանին 3 ժամից մեկ րոպե ավել պահելու որեւէ իրավական հիմք ոստիկանությունը չուներ: Ու չկար այլ հնարավորություն, քան երեք ժամը լրանալուն պես բաց թողնելը: Օգտագործվեց առավելագույն ժամանակը: Պարոն Հայրապետյանի հետ որեւէ քննչական-դատավարական գործողություն չի կատարվել, պարոն Հայրապետյանն ասել է, որ ապօրինի զենք-զինամթերք չունի: Փաստաթղթեր են կազմվել: Ամբողջ գործողությունը, եթե սկզբից մինչեւ վերջ հաշվենք, կարող է լինել ոչ ավելի, քան 15 րոպե»:
Aravot.am-ի ճշգրտող հարցին՝ այսինքն երեք ժամ ու ոչ հարց, ոչ պատասխա՞ն, փաստաբանը պատասխանեց. «Այո, փաստացի երեք ժամ անձի հետ գործողություն չի կատարվել, բացառությամբ այդ 15 րոպեն: Ուղղակի պետք էր: Հանձնարարությունը տրված էր, որպեսզի երեք ժամը լրացնեն ու այդ երեք ժամը լրացվել է, որը օրենքով սահմանված առավելագույն ժամանակն է: Եթե օրենքով սահմանված լիներ ոչ թե երեք, այլ երեսուն ժամ, համոզված եղեք՝ այդ երեսուն ժամն էին պահելու»:
Աշոտ ՀԱԿՈԲՅԱՆ
