Ինչպես տեղեկացրել ենք, այսoր ոստիկանության 6-րդ վարչություն բերման են ենթարկել, այնուհետեւ 3 ժամը չլրացած ազատ արձակել ՀՖՖ նախկին նախագահ Ռուբեն Հայրապետյանին: Ոստիկանության տեղեկացմամբ, բերման են ենթարկել ապօրինի զենք-զինամթերք կրելու կասկածանքով: Ռուբեն Հայրապետյանին լրագրողները հարցրեցին ՀՖՖ-ի չարաշահումների փաստով հարուցված քրգործի՝ դուք ասել էիք, որ օրը կգա, ամեն ինչ կպատմեմ ֆեդերացիայի մասին, հիմա պատմելո՞ւ եք՝ Հայրապետյանը անմիջապես արձագանքեց. «Կարո՞ղ է գիտեք ես Վանեցյանն եմ, ես ամեն ինչ պատմել եմ: Ասել եմ՝ ամեն ինչ կտեսնեք, թե ով ինչքան է հափշտակել»:
Իսկ Ռուբեն Հայրապետյանի փաստաբան Ամրամ Մակինյանն էլ տեղեկացրեց, որ Ռուբեն Հայրապետյանի հետ բերման են ենթարկվել նաեւ իր ընկերները: Լրագրողները ճշտեցին՝ խոսքը Ռուբեն Հայրապետյանի թիկնապահների՞ մասին է՝ փաստաբանը պատասխանեց, որ ոչ, նման բան չկա, իր ընկերներն են: Այս պահին ոստիկանությունը Հայրապետյանի մեքենան չի վերադարձրել. «Պահվել է անձի գույքը ոստիկանությունում: Պատճառաբանությունը հետեւյալն է, որ թույլ տվեք զննենք: Մենք թույլ չենք տալիս զննեն: Կամակորությամբ մենք որեւէ բան թույլ չենք տալու: Մեքենաները գտնվում են 6-րդ վարչության բակում»: Փաստաբանն ասաց, որ այդ մասին դատախազությանը հաղորդում են ներկայացնելու, նաեւ բացատրություն են պահանջելու ոստիկանությունից, թե ինչ հիմքով է անձի գույքը փաստացի արգելափակված: Զննության թույլտվություն տալը անձի իրավասությունն է, նա չի ուզում դա թույլ տալ: Պետք է լինի դատարանի թույլտվություն: Փաստաբանը վստահեցրեց, որ եթե լինի թույլտվություն, թույլ կտան, բայց որեւէ մեկի կամայականությամբ դա չեն անի:
Թե ո՞ւմ մեքենաներն են դրանք, Մակինյանը պատասխանեց, որ մեկը Հայրապետյանին է վստահաբար պատկանում: Ոստիկանությունում Ռուբեն Հայրապետյանի հետ որեւէ քննչական, դատավարական գործողություն չի կատարվել: Նրան ազատ են արձակել՝ 3 ժամը լրանալուն պես:
Կարդացեք նաև
Հռիփսիմե ՋԵԲԵՋՅԱՆ
Հ. Գ. Ավելի ուշ իր ֆեյսբուքյան էջում Ամրամ Մակինյանը տեղեկացրել է. «Ռուբեն Հայրապետյանի մեքենաները վերադարձվեցին»:
