«Այս երկրում ինչքան համարձակ տղա կա՝ այդ տղերքին բռնել են: Այդ տղաներից ոչ մեկը Նիկոլից չի վախենում: Ընդամենը բռնել են, փորձել են այդ տղաներին վախեցնեն: Բայց բոլորդ տեսաք, այդ տղաները ոչ մի բանից չեն վախենում: Մեր տեսակը ընդհանրապես չի վախենում: Ոստիկանությունը հանգիստ կարա պառկացնի գետնին, բա հետո՞», – քիչ առաջ ոստիկանության մոտ լրագրողներին տված ճեպազրույցում ասաց ՀՖՖ նախկին նախագահ Ռուբեն Հայրապետյանը:
Հիշեցնենք, որ նրան այսoր բերման են ենթարկել ոստիկանության 6-րդ վարչություն՝ ապօրինի զենք-զինամթերք կրելու կասկածանքով:
Հարցին, թե ինչո՞ւ են ուզում վախեցնել՝ Ռուբեն Հայրապետյանը հարցով պատասխանեց. «Չե՞ք իմանում ինչի: Որ վախեցած ապրենք»:
Հարցին՝ դուք այս իշխանության համար ի՞նչ վտանգ եք ներկայացնում՝ Ռուբեն Հայրապետյանը պատասխանեց. «Այ, էդ Նիկոլից հարցրեք»:
Կարդացեք նաև
Դիտարկմանը, որ քրեական ենթամշակույթի դեմ են օրենքով պայքարում, հնարավո՞ր է, որ դրա շրջանակում են դա անում՝ Ռուբեն Հայրապետյանը պատասխանեց. «Քրեական ենթամշակույթի ամենամեծ ջատագովն այ երկրում ե՞ս էի, կամ Նարեկ Մալյանը, կամ Արթուր Դանիելյանը, կամ Նարեկ Սամսոնյանը, հա՞»:
Ռուբեն Հայրապետյանի համար հարց է առաջացել՝ եթե Արթուր Դանիելյանին թմրամիջոցների կասկածանքով բերման էին ենթարկում, բա ինչո՞ւ մեքենան չէին խուզարկում. «Ոնց որ հիմա ընթերակա են բերել մի հատ ալկոհոլիկի, հարբած, շան հոտը վրից գալիս էր: Ամեն րոպե կարան ասեն՝ անհայտ անձը զանգահարեց, 37 թիվն է: Անհայտ անձը զանգահարել է ու ասել է՝ Հայրապետյանի մեքենայի մեջ կա զենք ու զինամթերք ու ամեն օր կարան այդպես անեն: Թող անեն»: Նա վստահեցրեց, որ այսօր էլ այդպես է եղել:
Լրագրողները հարցրեցին՝ դուք ասել էիք՝ երբ հրավիրեն, գնալու եմ, ինչո՞ւ չհրավիրեցին, այլ բերման ենթարկեցին՝ Ռուբեն Հայրապետյանը պատասխանեց. «Հիմա էլ եմ ասում: Բա էս շոուն ո՞վ անի, բա ի՞նչ նկարեն, տանեն Նիկոլին ցույց տան: Բա պիտի նկարեն, տանեն Նիկոլին ցույց տան, որ տեսեք՝ Հայրապետյանին կանդալներով բերեցինք: Կամ մի հատ պատ էր, ստիպում էին, ասում էին՝ կանգնի դրա մոտ նկարենք: Իհարկե, ես չեմ կանգնել: Հիմա էլ մի հատ ռեմբո էին բերել, ինձ ասում էր՝ ոտդ ոտիդ մի գցի, մեզ վիրավորում ես, ուզում է մեզ վախացնի էլի իրա վախեցած հալով: Ժողովուրդ ջան, նման բաներով մեզ չեն կարող վախեցնել, ընդամենը շոու է: Մեն ազգովի մեղք ենք, պիտի փրկվենք էս չարիքից»:
Հռիփսիմե ՋԵԲԵՋՅԱՆ
