Մարտի մեկի գործի շրջանակում ՀՀ սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի պաշտպանները նախապատրաստում են նրա կալանքն անձնական երաշխավորությամբ փոխելու միջնորդություն ներկայացնել Երեւանի ընդհանուր իրավասության դատարանին: Լրագրողների հետ ճեպազրույցում այսօր Ռոբերտ Քոչարյանի շահերի պաշտպաններից Արամ Օրբելյանը տեղեկացրեց՝ Քոչարյանի ազատության համար երաշխավորած անձանց անունները հայտնի չեն լինելու մինչեւ դրանց՝ դատարանում հրապարակվելու պահը:
Ինչ վերաբերում է հարցին, թե երբ է միջնորդությունը ներկայացվելու, Արամ Օրբելյանը դժվարացավ հստակեցնել. «Դեռեւս նոր տարուց առաջ էինք մտադիր սեղմ ժամկետներում փորձել ներկայացնել, բայց տոնական շրջան էր: Հիմա ցուցակը վերջնական տեսքի ենք բերում»:
Հիշեցնենք, որ այս պահին Քոչարյանի գործը քննող դատավորին պաշտպանական կողմը ներկայացրել է մեղադրյալներ Ռոբերտ Քոչարյանի, Արմեն Գեւորգյանի, Սեյրան Օհանյանի եւ Յուրի Խաչատուրովի հանդեպ քրեական հետապնդումը հանցակազմի բացակայության հիմքով դադարեցնելու միջնորդություն, որի քննությունը կշարունակվի հաջորդ նիստում:
Հիշեցնենք նաեւ, որ Ռոբերտ Քոչարյանը կալանքից ազատվել էր Արցախի երկրորդ նախագահ Արկադի Ղուկասյանի եւ գործող նախագահ Բակո Սահակյանի անձնական երաշխավորությամբ, ապա՝ կալանավորվել:
Կարդացեք նաև
Լուիզա ՍՈՒՔԻԱՍՅԱՆ
