Ինչպես տեղեկացրել ենք, ընդամենը մի քանի օր առաջ՝ հունվարի 23-ին Սուսաննա Հովհաննիսյանը նշանակվել էր Շիրակի մարզպետարանի առողջապահության և սոցիալական ապահովության վարչության պետի ժամանակավոր պաշտոնակատար։ Այդ պաշտոնի համար դիմել էին երկու հոգի՝ Արման Աղաքարյանն ու Սուսաննա Հովհաննիսյանը, պայմանագիր կնքվել է վերջինիս հետ։ Սակայն պարզ դարձավ, որ 4 օր առաջ նրան ազատել են պաշտոնից։
Սա հարուցել է առողջապահական ոլորտի աշխատակիցների զարմանքը, թե ինչպես եղավ, որ դեռ չնշանակած՝ ազատել են պաշտոնից։
Մեզ Շիրակի մարզպետարանից ուղարկել են հետևյալ պարզաբանումը․ «Շիրակի մարզպետարանի քաղաքացիական ծառայության պաշտոններն ամբողջությամբ ենթարկվել են նոր դասակարգման, և հաստատվել է Շիրակի մարզպետարանի քաղաքացիական ծառայության պաշտոնների անվանացանկը:
2020 թվականի հունվարի 23-ին վարչապետի աշխատակազմի քաղաքացիական ծառայության գրասենյակ է ներկայացվել Շիրակի մարզպետարանի առողջապահության և սոցիալական ապահովության վարչության պետի թափուր պաշտոնը զբաղեցնելու համար 2020 թվականի հունվարի 22-ին կնքված N 1 ժամկետային աշխատանքային պայմանագիրը և դրա կնքման համար հիմք հանդիսացած փաստաթղթերի փաթեթը:
Կարդացեք նաև
Ուսումնասիրության արդյունքում պարզվել է, որ վերոնշյալ ժամկետային աշխատանքային պայմանագիրը կնքվել է նոր չափանիշներով գնահատված և դասակարգված Շիրակի մարզպետարանի առողջապահության և սոցիալական ապահովության վարչության պետի թափուր պաշտոնը զբաղեցնելու համար, որի վերաբերյալ հայտարարությունը հրապարակվել է 2020 թվականի հունվարի 13-ին:
Նոր չափանիշներով գնահատված և դասակարգված քաղաքացիական ծառայության պաշտոնների ամբողջական անվանացանկը հաստատելուց հետո թափուր պաշտոնը համալրվելու է մրցույթով՝ առանց ժամկետային աշխատանքային պայմանագիր կնքելու:
Հաշվի առնելով մրցութային կարգով զբաղեցված չլինելը՝ վարչապետի աշխատակազմի քաղաքացիական ծառայության գրասենյակը միջնորդել է լուծել 2020 թվականի հունվարի 22-ին կնքված N 1 ժամկետային աշխատանքային պայմանագիրը»:
Նունե ԱՐԵՎՇԱՏՅԱՆ
