ԱԺ ֆինանսավարկային եւ բյուջետային հարցերի հանձնաժողովի այսօրվա նիստում քննարկվեց 2019-ի պետական բյուջեի առաջին 9 ամիսների հաշվետվությունը:
Քննարկում ծավալվեց այն հարցի շուրջ, որ պետք է հարկային գաղտնիք պարունակող տեղեկատվությունը որոշակի բացել ու հրապարակել: ՊԵԿ նախագահ Դավիթ Անանյանը հորդորեց տնտեսվարողներին դիմել, եթե նրանք համաձայն են՝ կտրամադրեն տեղեկատվությունը, եթե ոչ՝ չի կարող:
«Իմ քայլի» պատգամավոր Եղիշե Սողոմոնյանն ասաց. «ՊԵԿ-ը տիրապետում է կազմակերպության ֆինանսական թվերին: Պարոն Անանյան, դուք նշում եք, որ հարկային գաղտնիքը նուրբ հարց է ու երբ հրապարակվի, կիրականացվի ծառայողական քննություն: Դեպքեր են լինում, օրինակ, հեռուստատեսությամբ հրապարակվում են: Օրինակ, «Սուր անկյուն» հաղորդաշարով ես հիշում եմ, որ Ավանի աղի հանքի հիմնադիրը ներկայացնում էր, թե որ ընկերությունն ինչքան աղ է Հայաստան ներմուծել, ինչ մաքսային արժեքներով, այդ մասով ի՞նչ ծառայողական քննություն է իրականացվել»:
Դավիթ Անանյանը պատասխանեց. «Չեմ կարծում, որ ծառայողական քննություն իրականացնելու գործառույթով օժտված է անձը, եթե անձը, որը դա հրապարակում է, հարկային մարմնից չէ: Այն անձը, որը տեղեկատվություն է բացահայտել, կարող է այդ տեղեկատվությունը ձեռք բերած լինի հարցումների միջոցով: Մենք պետք է առնվազն ունենանք ողջամիտ կասկած, որ այդպիսի տեղեկատվությունը փոխանցվել է հարկային ծառայողի կողմից»:
Կարդացեք նաև
ՊԵԿ նախագահն ասաց, որ եթե պարզվի, որ հարկային աշխատողի կողմից է այդ տեղեկատվությունը տրամադրվել, ընդհուպ՝ աշխատանքից կազատեն:
Եղիշե Սողոմոնյանն ասաց, որ պետք է այնպես անեն, որ «Հարկատու 3» ծրագիրն իրենց՝ պատգամավորների համար հասանելի դառնա: Դավիթ Անանյանն արձագանքեց՝ ասելով, որ իրենք անգամ հարկային աշխատողների «դոստուպի նկատմամբ ֆիլտրեր» են դրել. «Ամեն մեկն ունի իր User կոդը, եթե ամիսը մի քանի անգամ մտնում, դիտումներ է անում, կասկածելի՞ է այդ վարքագիծը, բնականաբար, ինչ-որ գործառույթ իրականացնելու բան ունի»:
Դավիթ Անանյանը չբացառեց, որ կարող է հարկային գաղտնիքի արտահոսք լինի, 2000-ից ավելի հարկային աշխատողներ ունեն, բայց ասել, որ այդ տեղեկատվությունը պետք է նաեւ պատգամավորներին հասանելի լինի, ուրեմն պատգամավորներն էլ պետք է վերահսկվեն ՊԵԿ-ի կողմից: Սողոմոնյանը հիշեցրեց, որ պատգամավորները պետական գաղտնիքի կրող են անգամ: Ի պատասխան՝ Դավիթ Անանյանն ասաց. «Գիտեմ, բայց կարծում եմ, պետական գաղտնիքն ու հարկային գաղտնի տեղեկատվությունը տարբեր բաներ են: Մենք իրար հետ չպիտի որոշենք՝ այդ տեղեկատվությունը դուք պե՞տք է ունենաք, թե՞ ոչ, հանրության հետ պետք է խոսենք, հանրությունը համաձա՞յն է, որ այդ տեղեկատվության տիրապետողների շրջանակը մեծացնենք»:
Ի պատասխան՝ իմքայլական պատգամավորն ասաց, թե հանրությունը մենք ենք, մեզ է ընտրել հանրությունը: Դավիթ Անանյանի արձագանքն այսպիսին էր. «Մի ընտրող էլ ես եմ, ես չեմ ուզում, որ այդ տեղեկատվությանը դուք հասանելիություն ունենաք»:
Ըստ ՊԵԿ նախագահի, առնվազն հանրային քննարկման կարիք կա, հարկային գաղտնիքը առեւտրային գաղտնիք է:
Հռիփսիմե ՋԵԲԵՋՅԱՆ
