Վերաքննիչ քրեական դատարանում այսօր ավարտվեց Սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի պաշտպաններին Մարտի 1-ի մայր գործի ամբողջական նյութերի տրամադրման դեմ ՀՀ դատախազության բողոքի քննությունը։ Որոշումը կհրապարակվի փետրվարի 6-ին՝ 10:30-ին։
Հիշեցնենք, որ Ռոբերտ Քոչարյանի պաշտպաններից Հովհաննես Խուդոյանը դեռեւս նախաքննության ընթացքում միջնորդություն էր ներկայացրել՝ պահանջելով տրամադրել Մարտի 1-ի մայր գործով բոլոր նյութերը, քննիչը մերժել էր:
https://www.facebook.com/aravot.am/videos/2364953343608883/
Փաստաբանը բողոք էր ներկայացրել դատարան, և 2019 թ.-ի նոյեմբերին Երևանի ընդհանուր իրավասության դատարանը՝ դատավոր Արման Հովհաննիսյանի նախագահությամբ, բավարարել էր բողոքը՝ պարտավորեցնելով ՀՔԾ-ին Ռոբերտ Քոչարյանի պաշտպաններին տրամադրել Մարտի 1-ի մայր գործի նյութերն ամբողջությամբ: Դատախազությունն էլ բողոքարկել է այդ որոշումը՝ գտնելով, որ առաջին ատյանի դատարանը դատական սխալ է թույլ տվել:
Կարդացեք նաև
«Մեզ տրամադրված նյութերի հատորների ցուցմունքներն ամբողջական չեն, որոշ դեպքերում՝ կրկնվող: Քննիչներն առանձնացրել են միայն մեղադրանքը փաստող ապացույցները, ինչը խոսում է այն մասին, որ նախաքննությունն ամբողջությամբ գնացել է մի ուղղությամբ՝ խուսափել արդարացնող ապացույցներից, ի մի բերել միայն մեղադրական ապացույցները»,-բողոքի քննության այսօրվա նիստում հայտարարեց Քոչարյանի պաշտպան Հովհաննես Խուդոյանը:
Լուիզա ՍՈՒՔԻԱՍՅԱՆ
