Ինչպես տեղեկացրել ենք, այսօր միջադեպ էր տեղի ունեցել Գյումրիում․ Ճանապարհային ոստիկանության Գյումրու ստորաբաժանման երկրորդ դասակի հրամանատար Լ. Ղանդիլյանը 10 ոստիկանների ներկայությամբ ժամը 16:40-ից 16:50-ի սահմաններում քաշքշել, վիրավորել էր իր վստահորդի հետ տուգանային հրապարակ եկած գյումրեցի փաստաբան Հայկ Հարությունյանին։ Փաստաբանը դիմել էր իրավապահներին։
Հայկ Հարությունյանն Aravot.am-ի հետ զրույցում պատմել էր հետևյալը․«Ղանդիլյանը, տեսնելով վստահորդիս իմ հետ, սկսեց բղավել, թե էս փաստաբանի հետ ես գալիս հա՞։ Հետո սկսեց իմ հետ խոսել այ տղայով, քաշքշել, հրել, դուրս անել, թե ոտքդ ստեղ էլ չտեսնեմ։ Դա ժամը 14․50 կողմերն էր, մի պահ շոկի մեջ ընկա, հետո նորից գնացի խոսելու հետը, առաջարկեցի մարդկայնորեն վերջ տալ այս պատմությանը, ներողություն խնդրի, անցնի, գնա, բայց ինքը պնդեց, որ ճիշտ է արել, լավ է արել, երևի իրեն ինչ-որ մեկը դուխ է տվել»։
Քիչ առաջ ՀՀ ոստիկանության հասարակայնության հետ կապերի և լրատվության վարչության պետ Աշոտ Ահարոնյանն Aravot.am-ին տեղեկացրեց, որ ՀՀ ոստիկանապետի ժամանակավոր պաշտոնակատար Արման Սարգսյանի հանձնարարությամբ միջադեպն ուսումնասիրվում է ներքին անվտանգության վարչությունում։
Կարդացեք նաև
Նունե ԱՐԵՎՇԱՏՅԱՆ
