«Մենք չենք կարող հիմա որեւէ քաղաքական փաստաթուղթ ստորագրել և լուծել այս հակամարտությունը, որովհետեւ դա կանգնած հակամարտություն չէ ինչ-որ տարածքների շուրջ, դա հակամարտություն է մարդկանց եւ մարդկանց անվտանգության շուրջ: Չի կարելի սպասել, թե արտգործնախարարները գնալու են Ժնեւում կամ որեւէ այլ տեղում ինչ-որ փաստաթուղթ ստորագրեն, որը հարցը կկարգավորի, եւ մենք վաղն այլեւս այդ խնդիրը չենք ունենա»,-այսօր մեկնաբանելով Ժնեւում Հայաստանի եւ Ադրբեջանի արտգործնախարարների վերջին հանդիպումը ասաց «Օրբելի» կենտրոնի ադրբեջանական հարցերով փորձագետ Տարոն Հովհաննիսյանը:
«Զարկերակ» ակումբում հրավիրած ասուլիսում Հովհաննիսյանն ասաց, որ այս հանդիպումն առանձնացավ իր երկար տեւողությամբ: Ըստ նրա, այդ հանդիպումներով հակամարտության վերջնական կարգավորման հնարավոր չէ հասնել, սակայն դրանք կասեցնում են էսկալացիան. «Քննարկումները չեն եղել հարցի բուն կարգավորման շուրջ, քննարկումները կամ բանակցությունները եղել են միջավայրի ստեղծման շուրջ: Այս պահին բանակցությունները բուն խնդիրը չեն կարող լուծել, քանի որ դա միայն մեզնից կախված չէ»: Մեկնաբանելով կողմերի հայտարարությունը ադրբեջանագետն ասաց. «Այն ուներ մեկ շատ հետաքրքիր կետ, որ պետք է ապահովվի գործընթացի կոնֆիդենցիալությունը:
Դա համանախագահների կոչն է, որին, ըստ էության, համաձայնել են Հայաստանի եւ Ադրբեջանի արտգործնախարարները: Իմ կարծիքով, այդ կոնֆիդենցիալությունը վերաբերում է դեռեւս չհամաձայնեցված կետերին, որոնք քննարկվում են բանակցությունների գործընթացում»:
Նա հիշեցրեց, թե ինչպես 2019-ի դեկտեմբերի 5-ի Բրատիսլավայի հանդիպումից հետո Ադրբեջանի արտգործնախարարը տվեց գրեթե 1-ժամանոց հարցազրույց, բացի այդ Ադրբեջանի ԱԳՆ-ի կողմից տեղեկատվության տարածվեց 2020 թվականի սկզբին պլանավորված հանդիպման վերաբերյալ: Նրա խոսքով. «Մամեդյարովի հայտարարությունում միանշանակ կային կետեր, որոնք ամենայն հավանականությամբ քննարկել են բանակցության ընթացքում, սակայն դրանք դեռեւս աշխատանքային կետեր են, այսինքն՝ դրանց շուրջ ձեռք բերված որեւէ պայմանավորվածություն չկա:
Եվ երբ այդ ամենը ներկայացնում են քո սեփական մեկնաբանությամբ՝ նպատակ ունենալով ինչ-որ կերպով ազդել քո հասարակության եւ հակառակորդ կողմի հասարակության վրա, դու, ըստ էության, վնասում ես բանակցային գործընթացին: Այսինքն՝ այդ կետի շուրջ համաձայնություն չի էլ կարող լինել»:
Կարդացեք նաև
Պարոն Հովհաննիսյանի համոզմամբ, Ադրբեջանի նախագահը վարում է հայատյաց քաղաքականություն, ռասիստական հայտարարություններ է անում, սպառնում պատերազմով, խաղաղ բնակիչների դեմ իրականացնում է թշնամական ագրեսիվ գործողություններ, որոնց էլ ստիպված պատասխանում են հայկական զինված ուժերը: Նրա կարծիքով այս ամենը խորացնում է հակամարտությունը. «Այսօր անվտանգությանը սպառնացող մթնոլորտը եւ գործոնները ոչ թե 1994 թվականի մակարդակի վրա են, այլ ամեն օր խորանում են»:
Լուսինե ԲՈՒԴԱՂՅԱՆ
