Արդարադատության նախարար Ռուստամ Բադասյանն այսօր մասնակցել է «Հայաստանում ստեղծվում է Հակակոռուպցիոն կոմիտե. կառույցի ձևավորման խնդիրները» թեմայով հանրային քննարկման: Միջոցառումը կազմակերպել էր «Իրազեկ քաղաքացիների միավորում» հասարակական կազմակերպությունը:
Հիշեցնենք, որ Արդարադատության նախարարությունը «Հակակոռուպցիոն կոմիտեի մասին» նախագծերի փաթեթ է ներկայացրել հանրային քննարկման:
Նախարարի խոսքով՝ քաղաքական կամքի առկայությունը կոռուպցիայի դեմ պայքարելու համար անհրաժեշտ նախադրյալ է, սակայն Կառավարությունը բազմիցս շեշտել է, որ միայն դա բավարար չէ կոռուպցիայի դեմ արդյունավետ պայքարի համար: «Անհրաժեշտ է կայացնել այնպիսի պետական կառույցներ, որոնք ունակ են անկախ քաղաքական ուժերի վերադասավորումներից՝ արդյունավետ պայքարել կոռուպցիայի դեմ, ունենան մասնագիտացված աշխատակիցներ և այնպիսի ընտրության ու նշանակման ընթացակարգեր, որոնք ապահովում են չքաղաքականացված մասնագիտական գիտելիքներին պատշաճ տիրապետող անձանց առկայությունը»,- նշել է Ռուստամ Բադասյանը:
Անդրադառնալով Հակակոռուպցիոն կոմիտեի առանձնահատկություններին՝ արդարադատության նախարարը նշել է, որ այս կառույցում մեկտեղված են լինելու քննչական և օպերատիվ հետախուզական գործառույթները: «Երկրորդ բաղադրիչը կադրերի՝ մրցութային կարգով ընտրելու ընթացակարգն է, ինչը նշանակում է, որ մրցութային հանձնաժողովներ են ձևավորվելու թե՛ հակակոռուպցիոն մարմնի ղեկավարի ընտրության համար, և թե՛ փորձառու քննիչների տեղափոխման ու նոր կադրերի ընտրության փուլում»,- ընդգծել է Ռուստամ Բադասյանը:
Կարդացեք նաև
Հանրային քննարկման ժամանակ նախարարն անդրադարձել է նաև նախատեսվող սոցիալական երաշխիքներին, Հակակոռուպցիոն կոմիտեի կազմում ստեղծվելիք ներքին անվտանգությունը ստուգող ստորաբաժանման գործառույթներին: Վերջինի առումով Ռուստամ Բադասյանը տեղեկացրել է, որ հակակոռուպցիոն մարմնի աշխատակիցների բարեվարքությունը մշտապես ստուգելու առումով կարող է ներդրվել նոր գործիք, ըստ որի՝ նրանց հնարավոր է կոռուպցիոն բնույթի առաջարկ արվի, և եթե կոռուպցիոն ռիսկեր ի հայտ գան, կքննարկվի տվյալ աշխատակցին կարգապահական պատասխանատվության, Հակակոռուպցիոն կոմիտեից ազատելու հարցը:
Այնուհետև, հարցուպատասխանի ձևաչափով նախարարն արձագանքել է հանրային քննարկման մասնակիցների հարցերին:
ՀՀ ԱՆ ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ՎԱՐՉՈՒԹՅՈՒՆ
