Այսօր հրավիրած ասուլիսում լրագրողները ՀՅԴ ԳՄ անդամ Արծվիկ Մինասյանին հարցրեցին՝ «Իմ քայլը» խմբակցության պատգամավոր Քրիստինե Պողոսյանը, հիշեցնելով 2014-ի փետրվարը, երբ ՀՅԴ անդամ Արմեն Ռուստամյանը Հրայր Թովմասյանին վիրավորել էր, հույս է հայտնել, որ Հրայր Թովմասյանը եւս կդիմի դատարան՝ ընդդեմ Ռուստամյանի, ինչպե՞ս կարձագանքեք:
Հիշեցնենք, որ Ռուստամյանը Թովմասյանին ասել էր «չ…խ»՝ ներկայացնելով դա իբրեւ «ճաք տված», ինչու բուռն քննարկումների, բառարաններից այդ բառի բացատրությունների մեջբերման հիմք էր դարձել ԱԺ նիստերի դահլիճում ու դրանից դուրս:
Արծվիկ Մինասյանը պատասխանեց. «Քրիստինե Պողոսյանին եւ ընդհանրապես շատ պատգամավորների, կառավարման համակարգում գտնվող անձանց պակասում են նվազագույն իրավական գիտելիքները: Հաճախ լսում ես մարդկանց կողմից արտահայտություններ, որոնք իրավունքի տարրական իմացության հետ ուղղակի կապ չունեն: Ինչ վերաբերում է փոխադարձ գնահատումներին, որը եղել է քաղաքական այն իրադրության մեջ, որի վկայակոչումն է անում, ապա դա այն իրականության մեջ էր, որը ներկայացվել է, մնացած զարգացումները մեր համար ընկալելի, ընդունելի չեն»:
Ըստ Արծվիկ Մինասյանի, իշխանության առանձին ներկայացուցիչներ, երբ հարձակումներ են գործում ՍԴ նախագահի վրա, տարրական բարոյական նորմերը հաշվի չեն առնում. «Ես չգիտեի, որ Քրիստինե Պողոսյանը սասունցի է, ես էլ եմ սասունցի: Քրիստինե Պողոսյանի արտահայտությունները ակնհայտ նույնիսկ վիրավորական են, դա ԱԺ պատգամավորին վայել պահվածք չէ, ինչպես որ շատ այլ պատգամավորների պահվածքը, նաեւ գործադիր իշխանության բարձր ներկայացուցիչներինը»:
Կարդացեք նաև
Հռիփսիմե ՋԵԲԵՋՅԱՆ
