Հայաստանի և Ադրբեջանի արտագործնախարարների՝ Ժնևում տեղի ունեցած բանակցություններն ամենաինտենսիվն էին վերջին տարիներին, կողմերը պայմանավորվել են առաջիկայում հանդիպել: Այս մասին «ՌԻԱ Նովոստիին» ասել է Ադրբեջանի ԱԳՆ պաշտոնական ներկայացուցիչ Լեյլա Աբդուլլաևան:
«Ադրբեջանի և Հայաստանի ԱԳՆ ղեկավարների՝ Ժնևում անցկացված բանակցությունները ղարաբաղյան հակամարտության կարգավորման ուղղությամբ ամենաինտենսիվն էին վերջին տարիների ընթացքում: Կողմերը քննարկել են համանախագահների ներկայացրած օրակարգը: Այդ կապակցությամբ քննարկվել են 2019թ. առաջ քաշված առաջարկները, մասնավորապես, ժողովուրդներին խաղաղության նախապատրաստելու, հումանիտար փոխանակության վերաբերյալ, կարգավորման հիմքում ընկած սկզբունքներն ու տարրերը, Հելսինկյան եզրափակիչ ակտի կետերն ու սկզբունքները, ի վերջո, բանակցային գործընթացի ինտենսիվացումը: Նախարարները պայմանավորվել են առաջիկայում կրկին հանդիպել»,- ասել է Աբդուլլաևան:
Հայաստանի ԱԳՆ խոսնակ Աննա Նաղդալյանն էլ գործակալության հետ զրույցում նշել է, որ «ինտենսիվ քննարկումների» ընթացքում բարձրաձայնվել է հարցերի լայն շրջանակ՝ կապված Ղարաբաղյան հակամարտության խաղաղ կարգավորման, 2019թ. ձեռք բերված պայմանավորվածությունները կյանքի կոչելու հետ:
«Քննարկվել է նաև կարգավորման գործընթացի առաջմղման ժամանակացույցը և օրակարգը: Մնացականյանն ընդգծել է Արցախի ժողովրդի ընտրված ներկայացուցիչների խաղաղության գործընթացում ներգրավելու անհրաժեշտությունը»,- ասել է Նաղդալյանը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
