«Քննարկել ենք ոստիկանությանը վերաբերող հարցեր եւ խնդիրներ, եղան սուր հարցեր: Վստահ եմ, որ հանդիպումը ստացված է: Խորհրդարանական երկրում սա հաշվետվողականության ձեւ է»,-«Քաղաքացիական պայմանագիր» կուսակցության անդամների հետ հանդիպումից հետո լրագրողների հետ ճեպազրույցում այսօր ասաց ՀՀ ոստիկանապետի պաշտոնակատար Արման Սարգսյանը:
Լրագրողները հետաքրքվեցին, թե Սարգսյանն ինչ գնահատական ունի այն փաստի վերաբերյալ, որ օրերս «Ադեկվադ» միաբանության անդամները բերման են ենթարկվել ոչ համաչափ ուժի կիրառմամբ եւ անհիմն կասկածներով:
«Ոստիկանությունն իր լիազորությունների շրջանակում է իրականացրել գործառույթները՝ օրենքի սահմաններում: Ոստիկանությունը, հանդիսանալով հետաքննող մարմին, իրավասու է ստացված տեղեկությունը ստուգելու նպատակով բերման ենթարկել անձին եւ ազատ արձակել՝ ստուգման արդյունքներով»,-պատասխանեց Արման Սարգսյանը:
Նրա խոսքով՝ առհասարակ, հնարավոր է, որ նույն անձանց պարբերաբար բերման ենթարկեն. «Այդ չորս անձին նկատի չունեմ, այլ առհասարակ: Վերջերս ԶԼՄ-ներից մեկն էր գրել, որ քրեական ենթամշակույթին հարող մեկին են պարբերաբար բերման ենթարկում: Տեղեկությունը ստուգելու համար մենք բերման ենք ենթարկում, ստուգում տեղեկության իսկությունը եւ ազատ արձակում՝ սահմանված ժամը լրանալուն պես»:
Կարդացեք նաև
Ինչ վերաբերում է կարծիքներին, որ Նարեկ Մալյանը եւ «Ադեկվադ»-ի անդամները քաղաքական հետապնդման են ենթարկվում, ոստիկանապետի ԺՊ-ն համոզմունք հայտնեց, որ ՀՀ-ում որեւէ մեկը քաղաքական հետապնդման չի ենթարկվում. «Այդ չորս անձանց եւ մյուսների առումով քաղաքական հետապնդման մասին խոսք չի կարող լինել»:
Լուիզա ՍՈՒՔԻԱՍՅԱՆ
