ՀՀ-ում տեղակայված ռուսական 102-րդ ռազմաբազայի ամրապնդումը եւ հայկական զինված ուժերի համալրումը ժամանակակից զինտեխնիկայով, Հայաստանի անվտանգության եւ առհասարակ, ՀԱՊԿ-ի սահմանների անվտանգության կարեւորագույն ուղղություններից է: Այս մասին այսօր Sputnik Արմենիայի մուլտիմեդիոն մամուլի կենտրոնում կայացած Երեւան-Մոսկվա-Բիշքեկ-Մինսկ տեսակամրջի ժամանակ հայտարարեց ՀԱՊԿ միացյալ շտաբի պետ, գեներալ-գնդապետ Անատոլի Սիդորովը` մեկնաբանելով վերջին շրջանում Հայաստանին հատկացված նոր սպառազինության մասին հարցը: Բանախոսի կարծիքով, Հայաստանի անվտանգության բարձրացումը, ՀԱՊԿ-ի`կովկասյան ուղղության ամրապնդման կարեւորագույն բաղադրիչ է:
Հիշեցնենք, որ այս սպառազինությունների ձեռքբերման պայմանագրերը համաձայնեցվել էին ավելի վաղ` ՀՀ զինված ուժերի արդիականացման 2018-2024 թվականների ծրագրի հիման վրա:
2019-ին Հայաստանը ՌԴ-ից ստացավ մեծ քանակությամբ ժամանակակից սպառազինություն`TOP-M2KM զենիթահրթիռային համակարգ եւ Cy-30CM բազմաֆունկցիոնալ կործանիչ:
Ճեպազրույցի թեման էր` «ՀԱՊԿ հավաքական անվտանգության համակարգի ուժերի և միջոցների ձևավորման և կառավարման մարմինների համատեղ նախապատրաստման 2019թ-ի արդյունքները և 2020թ-ի խնդիրները»: Թեմայի համատեքստում, բանախոսը նկատեց, որ ԱՄՆ-ի եւ ՆԱՏՕ-ի շրջանակներում համախոհ երկրների գործողություններն անցյալ տարի չեն նպաստել Կովկասյան տարածաշրջանում կայունության ամրապնդմանը եւ անվտանգության մակարդակի բարձրացմանը:
Կարդացեք նաև
ՀԱՊԿ պաշտոնյայի համոզմամբ, ԱՄՆ-եւ ՆԱՏՕ-ում նրա դաշնակիցները շարունակում են ջանքեր գործադրել`Կովկասյան տարածաշրջանում իրենց ազդեցությունն ամրապնդելու համար, այդ թվում նաեւ Վրաստանի հետ թե Վաշինգթոնի, թե Բրյուսելի կողմից ռազմական համագործակցության սերտացմամբ եւ բարձրացմամբ: Նրա համոզմամբ, թե Վաշինգթեոնը, թե Բրյուսելը նպատակադրվել են Վրաստանը վերածել ՌԴ-ին հակազդելու հիմնական գործիքի`Վրաստանին ցուցաբերելով տեխնիկական եւ ֆինանսական մեծ օժանդակություն, ինչպես նաեւ, տարեցտարի վրացական զինված ուժերում ընդլայնելով ամերիկյան եւ ՆԱՏՕ-ական մասնագետների ներգրավվածությունը`ռազմական պատրաստության մասով: ՀԱՊԿ պաշտոնյան հատուկ շեշտադրեց նաեւ այն հանգամանքը, որ անցյալ տարի մեծ թվով ամերիկյան եւ ՆԱՏՕ-ական նավերը պարբերաբար ելք ու մուտք են ունեցել վրացական ափերում գտնվող սեւծովյան նավահանգիստներ:
Նելլի ԳՐԻԳՈՐՅԱՆ
