Aravot.am-ը տեղեկացրել է Արարատի մարզի Լուսաշող համայնքում լարված վիճակի մասին, որը պայմանավորված է դպրոցի դասարանները կոմպլեկտավորելու որոշմամբ եւ այդ առիթով ծնողների ու ուսուցիչների դժգոհություններով:
Թեմայի վերաբերյալ մեկնաբանություն խնդրեցինք ԿԳՄՍ նախարարությունից, քանի որ հրաժարական ներկայացրած դպրոցի կառավարման խորհրդի անդամ Ահարոն Թովմասյանը հարց էր ուղել նախարարին՝ տարակուսանք հայտնելով, թե ինչ մարտավարությամբ են շարժվում՝ սահմանից 7-8 կիլոմետր հեռավորության վրա գտնվող գյուղի դպրոցի հանդեպ այդպես վարվելով:
Նախարարի մամուլի քարտուղար Անժելա Կժդրյանը փոխանցեց, որ կոմպլեկտավորումն իրականացնում է այն մարմինը, որի ենթակայության տակ գտնվում է դպրոցը, ապա ուղղորդեց դեպի Արարատի մարզպետարան:
Մարզպետարանից եւս մեկնաբանություն խնդրեցինք դպրոցի ճակատագրի վերաբերյալ, մանավանդ հրաժարական է տվել դպրոցի կառավարման խորհուրդը ողջ կազմով եւ չի բացառվում, որ ի նշան բողոքի՝ համայնքի ավագանին էլ հրաժարական տա, մանկավարժները նույնպես չցանկանան աշխատել նման պայմաններում:
Կարդացեք նաև
Արարատի մարզպետարանի լրատվականից էլ ստացանք հետեւյալ պարզաբանումը. «Դպրոցների ֆինանսավորման նոր համակարգի անցման պայմաններում, որը նախատեսված է 2020 թվականի հունվարի 1-ից, փոքրաթիվ աշակերտներ ունեցող դպրոցներն ընկնում են ֆինանսական ծանր վիճակի մեջ: Նախկինում այդ խնդիրը լուծվել է մարզին կրթության բնագավառում հատկացված ֆինանսական միջոցների շրջանակներում՝ համահարթեցում կատարելու միջոցով: Ֆինանսավորման նոր կարգի կիրառման պայմաններում անհրաժեշտություն է առաջանում Լուսաշողի և նմանատիպ դպրոցներում թերհամալրված աշակերտներով կոմպլեկտավորել բազմահամակազմ դասարաններ և իրականացնել դպրոցների աշխատողների օպտիմալացում:
Հարցը բազմաթիվ անգամ քննարկվել է մարզպետարանում և ԿԳՄՍ նախարարությանը ներկայացվել են համապատասխան առաջարկություններ:
Այս պահի դրությամբ հարցը գտնվում է քննարկման փուլում եւ մարզպետարանի կողմից ձեռնարկվում են անհրաժեշտ բոլոր միջոցները՝ դպրոցում ուսուցման առավել նպաստավոր պայմաններ ստեղծելու համար»:
Գոհար ՀԱԿՈԲՅԱՆ
Լուսանկարը՝ http://ecoclub.fpwc.org/-ից:
