Aravot.am-ի հետ զրույցում Շիրակի մարզի Ազատան համայնքի ֆերմեր Գևորգ Աբրահամյանը իր մտահոգությունը հայտնեց այն մասին, որ մարզի ջրամբարները դատարկ են ու կա երաշտի վտանգ, պատճառը, բնականաբար, չոր՝ առանց տեղումների ձմեռն է։
«Խայտառակ բան կլինի, եթե գարունն անձրևային, տեղումնառատ չլինի։ Որոշակի սպասելիքներ կան, մարտը միշտ կիսաձնառատ, կիսաանձրևառատ ամիս է եղել, միգուցե դա լինի փրկություն, բայց այս պահին վատ վիճակ է։ Գյուղատնտեսությամբ զբաղվելը, ոռոգովի դաշտերում ներդրումներ անելը գյուղատնտեսի համար չափից դուրս ռիսկային է, թեև շատերը իրենց կարողությունների չափով արդեն արել են․ Եվրոպայից սերմեր են պատվիրել, շուտով կներկրեն, հո չեն կարող բիզնեսը կործանել, պարենային անվտանգության հարց է, եթե վախենան ներդրում անելուց, խոսքը հաջորդ տարվա մասին է, այս տարվանն արդեն կա։
Ջուր չեղավ, մեծ խնդրի առաջ ենք կանգնում, կսկսվեն թանկացումները, տարին ջրառատ պետք է լինի․ գյուղացին առատաձեռն է, երբ որ լավ բերք է ստանում։
Ցորենուց, գարուց, ջրովի բազմամյա խոտաբույսերից սկսած՝ վերջացրած բանջարաբոստանային կուլտուրաներով խնդիր կունենանք, առաջ կգա նաև անասնակերի խնդիր։
Կարդացեք նաև
Հունվարին մնաց երկու օր, ծանոթանալով եղանակի տեսությանը՝ ենթադրում ենք, որ առաջիկա տաս օրերի ընթացքում ևս տեղումներ չեն լինի, պիտի աղոթենք, որ գոնե մարտ, ապրիլ ամիսներին ջրի երես տեսնենք։
Երեկ եմ վերադարձել Վրաստանից, մեր հարևան երկրի լեռնային գոտիներում գոնե որոշակի քանակությամբ ձյուն կա, հարևանները, կարծես, այս առումով վտանգի տակ չեն, Աստված չտա նման տեմպերով մենք գնանք անապատացման»,-ասում է Գևորգ Աբրահամյանը։
Լուսանկարը՝ shantnews.am-ի
Նունե ԱՐԵՎՇԱՏՅԱՆ
