«Կուզենայի, որ այս օրն իսկապես տոնական լիներ: Թվում է փոքր բան է, բայց երկու կամ հինգ տարի առաջ Երեւանում հազարավոր գովազդային վահանակներ կային՝ բանակի օրը խորհրդանշող պատկերներով: Մի քանի օր նայում եմ՝ չկան, վերացել են, անիմաստ տեքստեր են: Սա է, որ պակասում է մեզ՝ հավատարմությունը զոհերի հիշատակի առաջ եւ նրանց փառաբանումն ամեն օր»,-Եռաբլուրում բանակի կազմավորման օրվա առթիվ լրագրողների հետ զրույցում այսօր ասաց Մարտի 1-ի գործով սահմանադրական կարգի տապալման համար մեղադրվող ՀՀ երկրորդ նախագահ Ռոբերտ Քոչարյանի ազատության հանձնախմբի համակարգող, ՀՅԴ-ական նախկին պատգամավոր Աղվան Վարդանյանը:
Նրա խոսքով՝ ոչ միայն պաստառներն են պակասում, այլեւ ոգին, վերաբերմունքը. «Բանակի, զինվորականության, հրամանատարության, բանակի ստեղծման եւ մեր խաղաղ կյանքն ապահոված նախագահների հանդեպ վերաբերմունքն է պակասում: Ժամանակավոր իրականություն է, բայց սա է»:
ԶՈՒ հանդեպ ՀՀ իշխանության քաղաքականությունն Աղվան Վարդանյանին չի բավարարում: Նա նշեց. «ԶՈւ հանդեպ վերաբերմունքը, Արցախի ռազմաքաղաքական ղեկավարության հանդեպ վերաբերմունքը…մեր տասնյակ զորահրամանատարներ ճնշումների եւ հալածանքների տակ են, եւ դա անում է մի թիմ, որի առնվազն հիսուն տոկոսը բանակի հետ առնչություն չի ունեցել: Ցավալի է»:
Ինչ վերաբերում է Սահմանադրական դատարանի շուրջ իրավիճակին, Աղվան Վարդանյանը նախընտրեց տոնական օրն այդ մասին չխոսել, միայն շեշտեց. «Այնպես չէ, որ ես վարչապետի պես տեղյակ չեմ Վահե Գրիգորյանի հետաքրքիր կարգավիճակից»:
Կարդացեք նաև
Լուիզա ՍՈՒՔԻԱՍՅԱՆ
