Հունվարի 20-ին հաղորդագրություն էր տարածվել, որ «ՎԵՏՕ» շարժման գրասենյակ են այցելել Իրանի Իսլամական Հանրապետության դեսպանատան մշակույթի գծով կցորդ Մոհամադռեզա Հեյդարին և քաղաքական գծով կցորդ Մոհամադռեզա Նասիմին: «Շուրջ 4 ժամ տևողությամբ հանդիպման ընթացքում քննարկվեց հարցերի լայն շրջանակ»,- ասված էր շարժման տարածած հաղորդագրության մեջ:
Իրանահայ լրագրող Ջորջ Աբրահամյանն այսօր գրառում է կատարել. «Հարգելի ընկերներ, քիչ առաջ կապ հաստատեցի Հայաստանում ԻԻՀ դեսպանատան մշակութային կցորդ պարոն Հեյդարիի հետ, պարզաբանում ստանալու համար «Վետո» շարժման գրասենյակում Նարեկ Մալյանի հետ նրա հանդիպման կապակցությամբ: Հանդիպումը ցավոք սրտի, սխալ մեկնաբանությունների տեղիք է տվել:
Պարոն Հեյդարիի խոսքերով. «Հանդիպումը տեղի է ունեցել Նարեկ Մալյանի հրավերով, քանի որ վերջինս հեղինակել է երեք գիրք, որոնցից մեկը թարգմանվել է պարսկերենի: Պարոն Մալյանը ինձ դիմել է խնդրանքով՝ աջակցել իր գրքերը, հատկապես՝ պարսկերեն թարգմանված գիրքն Իրանում հրատարակելու հարցում: Նման հանդիպումներ, հատկապես հաշվի առնելով դրանց մշակութային բնույթը, կենտրոնի ներկայացուցիչների կողմից հաճախ են կայանում: Ես պարոն Մալյանին ասացի, որ նման հնարավորություն դեռևս չկա և հանդիպումն ավարտվեց: Հավելեմ, որ գրքերի բովանդակության հետ ծանոթ չեմ:
Ինձ ընկերակցող անձը, որը պատկերված է նկարում, Իրանի դեսպանատան աշխատակիցն է, որին սխալմամբ ներկայացնում են որպես դեսպանատան ռազմական կցորդ: Նա ինձ ուղեկցել է ընկերական կարգով:
Կարդացեք նաև
Խնդրում եմ հանդիպումը չքաղաքականացնել և հրաժարվել Իրան-Հայաստան բարեկամական հարաբերությունների մեջ սեպ խրելու մտադրությունից, քանի որ Իրանի դիվանագետները և պետությունը որևէ մտադրություն չունեն հիբրիդային պատերազմ մղել Հայաստանում: Մեր հարաբերությունները շարունակում են մնալ ջերմ ու բարեկամական»:
