Եվրոպայի խորհրդի խորհրդարանական վեհաժողովի ձմեռային նստաշրջանի բացման լիագումար նիստի ընթացքում Բյուրոյի և Մշտական հանձնաժողովի առաջընթացի զեկույցի քննարկման ժամանակ նիդերլանդացի պատվիրակ Թինի Քոքսը հայտարարեց, որ զեկույցում ներկայացված են վիճակագրական տվյալներ 2012-ից սկսած Վեհաժողովում պաշտոնների հետ կապված գենդերային բաժանման վերաբերյալ: Նա խնդրեց պատվիրակներին հատուկ ուշադրություն դարձնել այս բաժանմանը: Պատվիրակը մտահոգություն հայտնեց. «Այս վիճակագրությունը ցույց է տալիս, որ նախորդ տարի Վեհաժողովի ամեն երեք անդամներից միայն մեկն է կին: Այս ցուցանիշը մի փոքր ավելի բարձր է, իհարկե, քան ազգային խորհրդարանների ընդհանուր միջին ցուցանիշը, որը կազմում է 29%: Այնուամենայնիվ, դեռևս երկար ճանապարհ ունենք այս հարաբերակցության հավասարակշռման հասնելու համար»:
Վերլուծելով ազգային պատվիրակություններում գենդերային բաժանման հետ կապված իրավիճակը՝ Թինի Քոքսը գովեց Վրաստանին, Լատվիային, Լյուքսեմբուրգին, Սերբիային, Նիդերլանդներին և մի քանի այլ երկրների, քանի որ նրանց ազգային պատվիրակությունների անդամների գոնե կեսը կանայք են: Այնուհետև զգուշացրեց մի քանի երկրների, այդ թվում նաև Հայաստանին. «Հատկապես ուզում եմ զգուշացել Հայաստանին, Խորվաթիային, Չեխիային, Մալթային, Լեհաստանին, Միացյալ Թագավորությանը և նրանց պատվիրակություններին, քանի որ նրանց պատվիրակություններում ամեն 4 անդամներից մեկն է կին, շատ դեպքերում նույնիսկ ավելի ցածր է ցուցանիշը: Հրավիրում եմ այս պատվիրակությունների ուշադրությունը և հորդորում ավելի լավ աշխատել այս ուղղությամբ այս տարի»:
Այնուհետև գոհունակություն հայտնեց, որ այս նստաշրջանի ընթացքում վերջապես «ընտանիքն» ամբողջացել է, քանի որ նիստին մասնակցում է ԵԽԽՎ-ում Ռուսաստանի պատվիրակությունը: Սակայն ինչպես արդեն տեղեկացրել ենք՝ հունվարի 27-ի լիագումար նիստի ընթացքում ԵԽԽՎ-ում վիճարկվեցին ազգային պատվիրակությունների, այդ թվում Ռուսաստանի, լիազորությունները՝ տարբեր հիմունքներով: Լիտվացի պատվիրակ Էմանուելիս Զինգերիսը վիճարկեց Ռուսաստանի պատվիրակության լիազորությունները՝ հիմնավորելով, թե վերջին օրերին Ռուսաստանում կասկածելի մի որոշում է ընդունվել փոխել սահմանադրական հավասարակշռությունը ազգային և միջազգային իրավունքի միջև, ինչպես նաև Վրաստանում տիրող իրավիճակը:
Էմանուելիս Զինգերիսն ասաց, որ այս վարքագիծը չի համապատասխանում ՌԴ ստանձնած պարտավորություններին և հորդորեց գործընկերներին միանալ իր նախաձեռնությանը:
Կարդացեք նաև
Նշենք, որ ռուսական պատվիրակության լիազորությունների հարցը առարկայական հարցերով Խորհրդարանը կքննի չորեքշաբթի՝ հիմնվելով մոնիթորինգի հանձնաժողովի զեկույցի վրա:
Տաթև ՀԱՐՈՒԹՅՈՒՆՅԱՆ
