Հունվարի 23-ին «Էրեբունի պլազա» հյուրանոց ներխուժած ու կրակոցներ արձակած երիտասարդը վարույթ իրականացնող մարմնին հայտնել է, թե ինչ նպատակով է այդ քայլին գնացել: Ըստ նրա ցուցմունքի՝ ինքը ցանկացել է տեսնվել ՀՀ 2-րդ նախագահ Ռոբերտ Քոչարյանի ավագ որդու հետ, քանի որ համոզված է, որ Քոչարյանի ավագ որդին՝ Սեդրակ Քոչարյանը, իրեն ծրագրավորել է, եւ ինքը ուզում էր նրանից ճշտել, թե ինչու է իրեն ծրագրավորել:
Այս մասին Aravot.am-ին հայտնեց կրակոցներ արձակած երիտասարդի պաշտպան, փաստաբան Էդուարդ Աղաջանյանը: Նա մեզ հետ զրույցում նաեւ ասաց, որ իր պաշտպանյալը մեծ հաճույքով պատասխանում է քննիչի հարցերին, համագործակցում է վարույթ իրականացնող մարմնի հետ, բայց նրա որոշ պատասխաններ անկախ դիտորդի մոտ ողջամիտ կասկածանք են առաջացնում իր հոգեկան առողջական վիճակի մասին: Փաստաբանն ասաց՝ չի զարմանա, որ վարույթ իրականացնող մարմինը առաջիկա օրերին որոշում կայացնի այդ երիտասարդին դատահոգեբուժական ստացիոնար փորձաքննություն նշանակել:
Մեր զրուցակցի խոսքով, իր պաշտպանյալը չի ընդունում առաջադրված մեղադրանքը, բայց ընդունում է՝ գույք է վնասել, պատանդ է վերցրել. «Բայց ամբողջ հարցն այն է, որ Քրեական օրենսգրքի 218-րդ հոդվածն ունի խրախուսական նորմ, համաձայն որի՝ եթե պատանդ վերցրած անձը կամովին ազատում է պատանդին և հրաժարվում է իր պահանջից, ապա նա ենթակա չէ քրեական պատասխանատվության»:
Իսկ ինչու է գույքը վնասել՝ երիտասարդը բացատրել է, որ իր սկզբնական նպատակը դա չի եղել, ուզում էր հասնել իր նպատակին՝ պատանդ վերցնել:
Կարդացեք նաև
Հիշեցնենք, որ հունվարի 23-ին 14:40-ի սահմաններում ՀՀ ոստիկանությունն ահազանգ էր ստացել, որ մի տղամարդ զենքով ներխուժել է «Էրեբունի պլազա» հյուրանոց, կրակում է եւ պահանջում հայտնել Ռոբերտ Քոչարյանի գրասենյակի տեղը, քանի որ ցանկանում է հանդիպել Վիկտոր Սողոմոնյանին:
«Ամենակարեւոր խնդիրը, որն այդ պահին դրված էր, լուծվեց, անարյուն հանգուցալուծմանն ականատես եղանք»,- այսօր լրագրողների հետ զրույցում ասաց ոստիկանապետի ժամանակավոր պաշտոնակատար Արման Սարգսյանը՝ անդրադառնալով «Էրեբունի պլազա» հյուրանոց ներխուժման ու կրակոցներ արձակելու դեպքին:
Ոստիկանապետի պաշտոնակատարը դեպքի վերաբերյալ այլ հարցերի չկարողացավ պատասխանել, ասաց, որ նախաքննական տվյալներին մանրակրկիտ ծանոթ չէ: Հարցին, թե ոստիկանությունում չկա՞ն հատուկ մասնագետներ հանցագործների հետ բանակցելու համար, ինչու ոստիկանապետի պաշտոնակատարը դա արեց, Արման Սարգսյանը պատասխանեց՝ իրավիճակից բխող գործողություններ, երբեմն, լինում են, ու այդ պահին այդպես ստացվեց:
Արփինե ՍԻՄՈՆՅԱՆ
