Հայաստանի հատուկ քննչական ծառայությունը հարցաքննել է ORSIS ապրանքանիշի տակ սպառազինություն արտադրող «Արդյունաբերական տեխնոլոգիաներ» ԲԲԸ-ի տնօրենների խորհրդի անդամ Սիմոն Ամիրովին սպառազինությունների մատակարարման գործով քննության շրջանակում: Այս մասին ՏԱՍՍ-ին ասել է Հայաստանում ORSIS-ի փաստաբան Ալեքսանդր Սիրունյանը:
«Ըստ մեր տեղեկատվության՝ նրանց մոտ հարցեր են եղել, ինչպես ես հասկանում եմ, կապված Հայաստանում, ընդհանուր առմամբ մեր բիզնեսի կազմակերպման հետ: Ինձ թվում է՝ նրանց պետք է նաև հետաքրքրի այն, որ ըստ իմ տեղեկությունների, մեր ընկերությունը ռուսական գրասենյակի խնդրանքով՝ որպես բարեկամական, գործընկերային հարաբերությունների նշան՝ պաշտպանության նախարարությանը հրացան են նվիրել: Եվ, ըստ մեր տեղեկությունների, այդ հրացանը չի փոխանցվել բանակի հաշվեկշիռ, և, կարծես թե, այն գրանցված է փոխնախարարներից մեկի՝ Մակար Ղամբարյանի անունով»,- ասել է փաստաբանը:
Ընդ որում, նա նշել է, որ ընկերության ներկայացուցչի հարցաքննությունը պայմանավորված է եղել նրանով, որ նա այդ դրվագների մասին քննությանը հետաքրքրող տեղեկատվության է տիրապետում: «Հաշվի առնելով, թե ինչի համար են կանչել Ամիրովին, որևէ վտանգ չկա, սա զուտ ֆորմալ գործընթաց է. նա տիրապետում է տեղեկատվության, որը պետք է փոխանցի քննությանը: Սիմոն Ամիրովի անձի և մեր գրասենյակի հետ կապված ես որևէ խնդիր չեմ տեսնում, քանի որ այդ մարդիկ տուժող են»,- ընդգծել է Սիրունյանը:
«Ի սկզբանե գործը հարուցվել է Քննչական կոմիտեում, այն սկսել են քննել, և քննությունը նրանք ցանկանում էին տանել ծուռումուռ ճանապարհով, քանի որ մենք այնտեղ բացահայտել ենք մի շարք կասկածելի կապեր՝ սկսած նրանից, որ պաշտպանության նախարարը և ռազմական գործերով վարչության պետը աներ-աներորդի են, մենք նաև պարզել ենք, որ Հայաստանի գլխավոր դատախազը և պաշպանության նախարարության գնումների համար պատասխանատու գլխավոր պաշտոնատար անձը նույնպես ազգականներ են»,- ասել է փաստաբանը:
Կարդացեք նաև
Նրա խոսքով՝ այս պահին քննությամբ զբաղվում է Հայաստանի Հատուկ քննչական ծառայությունը, որը քննում է կոռուպցիոն բնույթի գործեր:
«Մենք բողոք ենք ներկայացրել գլխավոր դատախազություն՝ պահանջելով ապահովել օբյեկտիվություն, իսկ օբյեկտիվությունը կարող է լինել միայն այնտեղ, որտեղ չկան ազգակցական կապեր: Ի զարմանս մեզ՝ մեր բողոքը բավարարվել է, և գործը փոխանցվել է Հատուկ քննչական ծառայությանը»,- ասել է փաստաբանը:
Իր հերթին, Հայաստանի պաշտպանության նախարարության մամուլի խոսնակ Արծրուն Հովհաննիսյանը ՏԱՍՍ-ին հայտնել է, որ գերատեսչությունը ««Պրոմտեխնոլոգիա» ընկերության հետ համագործակցության առումով որևէ խնդիր չունի»:
«Ինչ վերաբերում է կոնկրետ քրեական գործերին, նպատակահարմար չեմ համարում մեկնաբանել դրանք լրատվամիջոցներում: Ավելին, ճիշտ չեմ համարում ռուսական լրատվամիջոցներում մեկնաբանել ներհայաստանյան խնդիրներ»,- ասել է Հովհաննիսյանը:
Նրա խոսքով՝ նման մեկնաբանությունները էթիկապես ճիշտ չեն լինի, քանի որ «այստեղ հիշատակվում են պաշտպանության նախարարի, այլ բարձրաստիճան պաշտոնատար անձանց անուններ»:
Պատրաստեց՝ Վիկտորյա ԱՆԴՐԵԱՍՅԱՆԸ
