ԱԺ այսօրվա նիստում «Լուսավոր Հայաստան»-ի պատգամավոր Գեւորգ Գորգիսյանն անդրադարձավ ԿԳՄՍ նախարար Արայիկ Հարությունյանի՝ ԼՀԿ մեկ այլ պատգամավոր Անի Սամսոնյանի քննադատությանն ի պատասխան հնչեցրած արտահայտությանը, որ նա հին ալիքի վրա է մնացել:
«Երբ խոսում եք անցյալում մնալու մասին, տպավորություն է, որ չեք գիտակցել, որ արդեն մեկ տարուց ավելի է՝ իշխանություն եք, որ էլ չկան այլ իշխանություններ, որոնց դեմ պետք է պայքարել: Դուք պիտի կառուցեք, համակարգեր կառուցեք, ներդնեք: Եթե կան խնդիրներ, հին գործիքներով նոր արդյունքի չեք կարող հասնել, որովհետեւ մենք միասին էինք պայքարում այդ գործիքներով՝ այդ խնդիրների դեմ»,-ԿԳՄՍ նախարար Արայիկ Հարությունյանին այս խոսքերով դիմեց Գեւորգ Գորգիսյանը:
Նա նշեց,-«մեզ մեղադրում եք, որ հին հռետորաբանության մեջ ենք մնացել»,-ապա ծոցագրպանից բումերանգ հանեց,-«սա կոչվում է բումերանգ: Եթե սա շպրտում ես, հետ է գալիս»: ԱԺ դահլիճում շշուկներ տարածվեցին, ի պատասխան Գորգիսյանն արձագանքեց՝ «փորձե՞նք»:
Կարդացեք նաև
ԱԺ նախագահ Արարատ Միրզոյանն էլ ասաց՝ «այդ զենք եք բերե՞լ ԱԺ դահլիճ»: Գորգիսյանը ժպտալով պատասխանեց՝ «հուշանվեր է»: Ապա` Գորգիսյանը, դիմելով ԿԳՄՍ նախարարին, շարունակեց. «Եկեք հարգենք ինստիտուտներն ու այս ամբիոնից Ազգային ժողովի հետ քամահրանքով եւ բարձր տոնով չխոսենք»:
Լուիզա ՍՈՒՔԻԱՍՅԱՆ
