Այս շաբաթ խորհրդարանը, ինչպես այդ կառույցի ղեկավարն ասաց, «բեսեդկա» էր հիշեցնում, որտեղ, բացի միմյանց վիրավորելուց ու անպարկեշտ բառեր շռայլելուց, այլ բան դժվար էր լսել։ Սակայն ամեն մեկն իրենից դուրս էր փորձում տեսնել խնդիրը, բարեկրթության կոչ էին անում բոլորը, բայց ոչ մեկը այդ խորհրդին չէր հետևում։ Ու առնվազն տարօրինակ է, որ ԱԺ մեծամասնության ներկայացուցիչները հայտարարում են, թե իրենք հանդուրժող են քննադատության հանդեպ։ Այս կարծիքին է նաև «Իմ քայլը» խմբակցության անդամ ՎԱՂԱՐՇԱԿ ՀԱԿՈԲՅԱՆԸ։
-Այս երկու տարին ցույց տվեց, որ իշխանությունն ամենևին էլ «թավշյա» չէ, անհանդուրժող է քննադատության հանդեպ։ Ապացույցն այս շաբաթ խորհրդարանում բանավեճերի որակն է։ Ո՞ւր կորավ ձեր «թավիշը»։
-Ես Ձեզ խորհուրդ կտամ նայել վիճակագրությունը. ԱԺ-ում արդեն որերորդ անգամ միջադեպ է տեղի ունենում, և երբ վերլուծում ես իրավիճակը, հասկանում ես, որ այդ միջադեպը սկսվել է կոնկրետ անձանցից։ Դուք չեք գտնի մի իշխանական պատգամավորի, որը սկիզբ դրած լինի նման միջադեպերի։ Իշխանությունը ցուցաբերում է ծայրահեղ հանդուրժողականություն, մեր պատգամավորներն իրենց տոնայնության մեջ, քննարկումների ժամանակ չեն անցնում կարմիր գիծը, որով մարդկանց կվիրավորեն։
-Պարոն Հակոբյան, անգամ հակադարձման կարիք էլ չկա, ընդամենը պիտի մեկիկ-մեկիկ լսել ձեր խմբակցության պատգամավորների ելույթներն ու հասկանալ, թե որքան ազնիվ եք Դուք Ձեր խոսքում։
Կարդացեք նաև
-Օրենքների բովանդակային քննարկումների ժամանակ կարող ենք ունենալ տարատեսակ կարծիքների բախումներ, թեժ քննարկումներ, բայց անձնական վիրավորանքների դեպքեր չեմ հիշում։ Բովանդակային քննարկումը պետք չէ խառնել անձնական վիրավորանքի հետ։
-Հասարակ քննադատության հանդեպ եք անգամ անհանդուրժող, և դա ցցուն երևում է ամենաբարձր մակարդակով։ Վարչապետն իր գրեթե յուրաքանչյուր հրապարակային ելույթում հանրային որևէ շերտի է վիրավորում, այս կամ այն քննադատությանն է սուր հակադարձում, էլ չենք խոսում լրատվամիջոցներին հաթաթա տալու մասին։
-Ձեր տեսակետին համամիտ չեմ։
-Այս խորհրդարանի գործունեության մեկ տարին լրացավ, ի՞նչ որակական փոփոխություններ բերեցիք։
-Դրա ամենալավ գնահատականն իշխող մեծամասնության հանդուրժողականությունը, գրագիտությունն է։ Դուք մեր խմբակցությունում չեք գտնի մեկին, որը գրագիտության որոշակի մակարդակի հասած չլինի մինչ պատգամավոր դառնալը։
Ռուզան ԽԱՉԱՏՐՅԱՆ
Հարցազրույցն ամբողջությամբ՝ «Իրատես» թերթի այսօրվա համարում
