Ազգային ժողովն այսօր առաջին ընթերցմամբ քննարկում է «Էներգետիկայի մասին» ՀՀ օրենքում փոփոխություն կատարելու մասին օրինագիծը, որը սահմանում է՝ էլեկտրաէներգիայի, ջերմաէներգիայի արտադրության լիցենզիա ստանալու համար դիմող եւ 10% մասնաբաժին ունեցող իրավաբանական անձանց ինքնությունը պետք է թափանցիկ լինի, այդ անձինք պետք է հայտարարագրվեն:
ԲՀԿ պատգամավոր Սերգեյ Բագրատյանն օրինագծի հարակից զեկուցող, «Իմ քայլի» պատգամավոր Արտաշես Պետրոսյանից հետաքրքրվեց՝ ինչո՞ւ 10%, թող ամբողջությամբ բացահայտվի: Արտաշես Պետրոսյանը նշեց՝ այս պահին առաջարկվում է մինչեւ 10% ունեցող փայատերերին բացահայտել, իսկ նախադեպը հանքարդյունաբերության ոլորտին վերաբերող օրենսդրական փոփոխությունն է, որն ընդունվեց նախորդ տարի եւ որով հանքարդյունաբերության ոլորտում 10% բաժնեմաս ունեցողները պարտավոր են հայտարարագրվել:
«Օրենքն աշխատի, հասկանանք, թե արդյոք կարիք կա՞ շեմն իջեցնելու»,-նշեց Արտաշես Պետրոսյանը:
«Իմ քայլի» պատգամավոր Գեւորգ Պապոյանը, կարեւորելով օրինագիծը, շեշտեց՝ նախկինում այն չէր կարող ընդունվել, քանի որ ԱԺ դահլիճում նստած էին մարդիկ, որոնք բնական պաշարների տերեր էին եւ բացահայտվել չէին ցանկանա:
Կարդացեք նաև
ԱԺ տնտեսական հարցերի հանձնաժողովի նախագահ Բաբկեն Թունյանը տեղեկացրեց՝ կառավարության եզրակացությունն այս օրինագծի վերաբերյալ բացասական է, քանի որ Արդարադատության նախարարությունն իրագործման հետ կապված խնդիրներ է տեսնում. «Եկեք ընդունենք առաջին ընթերցմամբ եւ քննարկենք ռիսկերը եւ հակափաստարկները: Եթե մինչեւ երկրորդ ընթերցում մեզ համոզեն, որ խնդիրներ կան, հետ կվերցնենք օրենքը: Քանի որ հանքարդյունաբերության ոլորտում այս մեխանիզմը ներդրել ենք, նույնը նաեւ էներգետիկայի ոլորտում պետք է ներդնենք»:
Ապա Թունյանը հայտնեց, որ հանքարդյունաբերության ոլորտում 10% իրական սեփականատերերի մասին տեղեկությունների հրապարակման վերջնաժամկետը հունվարի 30-նն է. «Այսինքն, մի քանի օրից պետք է ունենանք հանքարդյունաբերության ոլորտում 10% եւ ավելի բաժնեմաս ունեցողների անունները»:
Անկուսակցական պատգամավոր Արման Բաբաջանյանն էլ կարծիք հայտնեց, որ օրինագիծը շոշափում է նախկին իշխանության եւ նրանց սպասարկող օլիգարխների շահերը, սակայն իր համար 10% շեմի ամրագրումը հասկանալի չէ:
Լուիզա ՍՈՒՔԻԱՍՅԱՆ
