ԱԺ նիստում այսօր անդրադարձ եղավ Երեւանի կենտրոնում գտնվող «Էրեբունի պլազա» բիզնես-կենտրոնում դեռեւս անհայտ անձի կողմից կրակոցներ արձակելու միջադեպին:
«Իմ քայլը» խմբակցության անունից պատգամավոր Հայկ Կոնջորյանը հայտարարեց՝ անձը ոստիկանությունում է, բարեբախտաբար՝ տուժածներ չկան:
«Շնորհակալություն ոստիկաններին, որ կարողացել են օպերատիվ եւ առանց զոհերի իրավիճակը հանգուցալուծել: Հստակ ընդգծեմ, որ ՀՀ իրավապահներն ամբողջությամբ տիրապետում են իրավիճակին եւ իրականացնում բոլոր գործողությունները՝ կատարվածի հանգամանքները բացահայտելու համար»,-վստահեցրեց Հայկ Կոնջորյանը:
Կարդացեք նաև
Նրա խոսքով՝ ՀՀ իշխանությունը վերահաստատում է, որ մեր երկրում բռնությունը տեղ չունի, եւ բռնության ցանկացած դրսեւորում, անկախ պատճառից, չունի արդարացում. «Իշխանությունն ունի պողպատյա կամք՝ ՀՀ-ում կառուցելու բռնությունից զերծ հասարակություն: Այս դեպքից հետո սոցցանցերում եւ մեդիայի որոշ ներկայացուցիչներ սկսել են տարատեսակ աղավաղող հայտարարություններ անել, իսկ պղտոր ջրում ձուկ որսացողների նոր կամ արդեն հայտնի խումբ էլ սկսել է նորից մանիպուլյացիաների միջոցով խեղաթյուրել կատարվածը եւ այն կապել այս կամ այն քաղաքական գործընթացների հետ»:
Հայկ Կոնջորյանի խոսքով՝ նման ջանքերն ապարդյուն են. «Իրավապահ համակարգը տեղի ունեցածը բացահայտելու է, բռնությունը մեր համար անընդունելի է: Հայրենակիցներին կոչ եմ անում պահպանել հանգստությունն ու զգոնությունը: Վստահ եղեք ՀՀ իրավապահների վրա: Ապոկալիպտիկ տրամադրությունների եւ խուճապի կարիք չկա, ամեն ինչ վերահսկողության տիրույթում է»:
Լուիզա ՍՈՒՔԻԱՍՅԱՆ
