Քրեական վերաքննիչ դատարանի դռնփակ նիստում կայացրած որոշման մասին լրատվամիջոցներին տեղեկացնելուց հետո, որով անօրինական են ճանաչվել ՀՔԾ գործողությունները, «Ժողովուրդ» օրաթերթի գլխավոր խմբագիր Քնար Մանուկյանը հետեւյալ հայտարարությունն արեց. «Լրագրողների հետ ամանորյա հանդիպման ժամանակ ես ՀՀ վարչապետ Նիկոլ Փաշինյանին ներկայացրել եմ, թե մենք ինչ իրավիճակում ենք հայտնվել, երբ նախաքննական մարմինները հակաօրինական ճանապարհով աղբյուրներ են բացահայտում, ներկայացրել եմ, թե կոնկրետ մարտի 1-ի գործով ինչ իրավիճակում եմ հայտնվել: Վարչապետը հրապարակավ հայտարարեց՝ իմ գործընկերները կողքիս են եղել, թե ամեն ինչ օրինականության դաշտում պետք է լինի: Ես հավելեցի, որ հենց այդ օրինական ճանապարհին եմ հետամուտ եւ իմ իրավունքները պաշտպանելու առումով մինչեւ վերջ գնալու եմ:
Արդյունքում, ՀՀ վարչապետին հատուկ ուզում եմ ասել, որ ՀՔԾ-ն անօրինականություն է թույլ տվել, եւ ես խնդրում եմ վարչապետին, որ ինքը կոնկրետ իրավապահ մարմինների այս անօրինական գործողությանը համապատասխան խիստ պատիժ-գնահատական տա:
Մենք հաղթանակին հասանք; Իսկ ինչ է սպասվում կոնկրետ քննիչին, դատախազին, մենք հերթական հայտարարությամբ հանդես կգանք: Անօրինական որոշման համար պատասխան են տալու եւ ՀՀ գլխավոր դատախազ Արթուր Դավթյանը եւ ՀՔԾ պետ Սասուն Խաչատրյանը: Սա բոլորիս պայքարն է, որովհետեւ այսօր «Ժողովուրդ» օրաթերթն է հայտնվել այս վիճակում, վաղը նույն վիճակում կարող է հայտնվել մեզանից յուրաքանչյուրը»:
Աշոտ ՀԱԿՈԲՅԱՆ
