Երեկ ԱԺ արտաքին հարաբերությունների հանձնաժողովի նախագահ Ռուբեն Ռուբինյանը, բացատրելով, թե ինչպես ու ինչ հանգամանքներում է սուրճ խմել նախկին իշխանությունների կարկառուն ներկայացուցիչ, ՀՀԿ փոխնախագահ Արմեն Աշոտյանի հետ, ասել էր. «Դա եղել է մոտ 7-8 ամիս առաջ, գաղտնի չի եղել, հրապարակվել է: Խոսակցության թեման երկուսն են եղել՝ հայտնի է, որ ԵԽԽՎ-ում ԱԺ պատվիրակության իմքայլականները, ներառյալ ես, մտել են ԵԺԿ-ի խմբի մեջ: Երբ ես քննարկում էի ԵԺԿ-ի մեր գործընկերների հետ խումբ մտնելու հարցը, այնտեղ մեզ խնդրեցին հաշվի առնելով, որ ՀՀԿ-ն ԵԺԿ անդամ է, տեղյակ պահել ՀՀԿ-ին՝ բարեվարքությունից ելնելով, ինչը ես արել եմ: Ոչ թե խնդրել եմ, այլ տեղյակ եմ պահել»:
Այս առնչությամբ այսօր Aravot.am-ը Ռուբինյանին հարցրեց՝ ԵԺԿ անդամ է նաեւ «Ժառանգություն» կուսակցությունը, ընդ որում, ավելի շուտ է անդամակցել, քան ՀՀԿ-ն, այդ դեպքում ինչո՞ւ բարեվարքությունից ելնելով չեք հանդիպել ու չեք սրճել նաեւ Րաֆֆի Հովհաննիսյանի հետ: Նա պատասխանեց. «Նախ, ես դրանից առաջ այսպես թե այնպես «Ժառանգության» անդամների հետ հանդիպել եմ: Բացի դրանից, մեր գործընկերները Ստրասբուրգում, երբ որ ես իրենց հետ խոսել եմ, քանի որ մինչ մեզ ԵԽԽՎ-ում ՀՀԿ-ականներն էին եւ ոչ «Ժառանգությունը», հենց այդ կոնտեքստում ենք հանդիպել: Սա կապ ուներ ԵԺԿ-ի խումբ մտնելու հետ, իսկ ԵԺԿ-ի խմբում ԵԽԽՎ-ում մեզնից անմիջապես առաջ ՀՀԿ-ականներն էին եւ ոչ «Ժառանգությունը», որովհետեւ «Ժառանգությունը» ԱԺ-ում ներկայացված չէր»:
Հռիփսիմե ՋԵԲԵՋՅԱՆ
