Այսօր կառավարության նիստում վարչապետ Նիկոլ Փաշինյանն անդրադառնալով մարզային մի քանի ծննդատների փակման խնդրին, պատմեց իր տեսած ռեպորտաժի մասին, որտեղ Ոսկեպարի ծննդկանը գնացել է Աչաջրի ծննդատանը ծննդաբերելու: Վարչապետի խոսքով, Աչաջրի ծննդատունն, ըստ չափանիշների, գտնվում է այն ծննդատների ցանկում, որոնք չեն համապատասխանում հետագա գործունեության համար չափանիշներին:
«Ոսկեպարը գտնվում է Նոյեմբերյանից 19 կիլոմետր հեռավորության վրա ու Նոյեմբերյանում կա ծննդատուն, շատ լավ վիճակում, նորոգված, լիարժեք հագեցված: Աչաջուր գյուղը Ոսկեպարից գտնվում է 25 կիլոմետր հեռավորության վրա, այսինքն՝ Նոյեմբերյան քաղաքն ու նրա ծննդատունն ավելի մոտ են Ոսկեպարին, քան Աչաջուրը, էլ չեմ ասում, որ Աչաջուրը Ոսկեպարից հեռու է 25.7 կիլոմետր, Իջեւանից հեռու է 34.3 կիլոմետր: Հարց ՝ ինչո՞ւ է ծննդկանը նախընտրել ավելի երկար ճանապարհ գնալ ու ավելի վատ հագեցած ծննդատանը ծննդաբերել»,-ասաց Փաշինյանը՝ նշելով, որ այս տվյալները ներկայացնելով՝ ցանկանում է ցույց տալ, որ հարցերը ինչպիսի մանիպուլյատիվ շահարկումների են ենթարկվում. «Այսինքն, եթե Ոսկեպարից ծննդկանը կարող է ավելի երկար ճանապարհ կտրել, ընդ որում, շնորհիվ այն բանի, որ ճանապարհները գտնվում են փայլուն վիճակում՝ ի տարբերություն 2018 թվականի: Փաստը ցույց է տալիս, որ մենք գործ ունենք պարզ մանիպուլյացիայի հետ»:
Լուսինե ԲՈՒԴԱՂՅԱՆ
