Բրիտանական The Economist Group-ի հետազոտական մարմինը՝ The Economist Intelligence Unit-ը (EIU), հրապարակել է «Ժողովրդավարության ինդեքս-2019» զեկույցը, որում Հայաստանը 5.54 միավորով զբաղեցրել է 86-րդ հորիզոնականը:
Նախորդ տարվա ինդեքսում Հայաստանը 4.79 միավորով զբաղեցնում էր 103-րդ հորիզոնականը:
Ըստ հետազոտության՝ Հայաստանում ընտրական գործընթացների բազմազանությունը գնահատվել է 7.5 միավոր, կառավարության գործունեությունը՝ 5.36, քաղաքական մասնակցությունը՝ 6.11, քաղաքական մշակույթը՝ 5.63, քաղաքացիական ազատությունները՝ 5.59 միավոր:
Հետազոտության մեջ ներառված է 165 երկիր, որոնք առանձնացվում են ըստ կառավարման ձևի՝ լիարժեք ժողովրդավարություն, թերի ժողովրդավարություն, հիբրիդային ռեժիմ և ավտորիտար ռեժիմ: Ըստ այդ, Հայաստանը ներառվել է հիբրիդային ռեժիմ ունեցող երկրների շարքում:
Կարդացեք նաև
Տարածաշրջանի երկրներից Վրաստանը Հոնդուրասի հետ կիսում է 89-րդ հորիզոնականը (հիբրիդային), Թուրքիան 110-րդ տեղում է (հիբրիդային), իսկ Ադրբեջանը 146-րդ տեղում է՝ ընդգրկվելով ավտորիտար ռեժիմ ունեցող պետությունների շարքում: Ռուսաստանը նույնպես 134 միավորով ավտորիտար երկրների շարքում է:
Ամենաժողովրդավար երկիր ճանաչվել է Նորվեգիան, որին հաջորդում են Իսլանդիան, Շվեդիան, Նոր Զելանդիան, Ֆինլանդիան: Վարկանշային աղյուսակը վերջին հորիզոնականներում են Չադը, Սիրիան, Կենտրոնաաֆրիկյան Հանրապետությունը, Կոնգոյի դեմոկրատական Հանրապետությունը և Հյուսիսային Կորեան:
Պատրաստեց՝ Վիկտորյա ԱՆԴՐԵԱՍՅԱՆԸ
