Աշխատանքի եւ սոցիալական հարցերի նախարարությունը սոցիալական աջակցության համակարգը վերանայում է: Այսօր լրագրողների հետ զրույցում նախարար Զարուհի Բաթոյանն ասաց, որ դրա համար աշխատանքային խումբ են ստեղծել վարչապետի հրամանով եւ արդեն առաջին արդյունքները ներկայացրել են վարչապետին, հիմա փորձագիտական կարծիքի համար փաստաթուղթը պետք է միջազգային կառույցներին ուղարկեն:
Բաթոյանն ասաց, որ գնահատման համակարգը պետք է փոխեն ու որպես հիմք պետք է ընդունեն ոչ թե ընտանեկան ծախսերը, թե որքան է ծախսում այդ ընտանիքը, այլ՝ եկամուտը: Նախ պետք է հաշվարկեն այն եկամուտը, որը քաղաքացուն պետք է բավարար կենսամակարդակ ունենալու համար եւ եկամուտների դեֆիցիտը աջակցությամբ փակել. «Այդ աջակցությունը կարող է լինել ֆինանսական, ոչ ֆինանսական՝ տարբեր ծրագրերով: Ոչ ֆինանսական աջակցության մեջ է մտնում աշխատանքի խրախուսումը, կարեւոր գործոն է լինելու աշխատունակության հարցը, երեխաների թիվը: Այս համակարգը թույլ է տալիս ավելի օբյեկտիվ գնահատել՝ հիմնվելով փաստացի հավաքագրվող տվյալների վրա, այդ աջակցությունը տրամադրել հասցեական»:
Հարցին՝ հաշվի է առնվելու նաեւ ընտանիքում ոչ աշխատունակ անձանց թիվը, սա ի՞նչ է ենթադրում, եթե ընտանիքում աշխատող քաղաքացիներ չկան, սա նշանակում է, որ նպաստից կարող են զրկվե՞լ՝ Բաթոյանը պատասխանեց. «Մոտեցումը հետեւյալն է՝ նախ հաշվում ենք ընտանիքի եկամուտը, դրանից պետք է հանենք աշխատունակության գործակիցը, եթե կա այդ ընտանիքում աշխատունակ տարիքի անձ: Աշխատունակ տարիքի անձի դեպքում մենք պետք է այլ ծառայություն տրամադրենք: Եթե ընտանիքում կա 4 մարդ, որից 2-ը աշխատունակ են ու չեն աշխատում, շատ ցածր է հավանականությունը, որ այդ ընտանիքը կընդգրկվի ֆինանսական աջակցության համակարգում: Եթե ընտանիքում չկա աշխատունակ անձ, օրինակ, տարեց մարդիկ են, ովքեր կենսաթոշակառու են, առաջին, երկրորդ խմբի հաշմանդամություն ունեցող մարդիկ են, այս դեպքում բնականաբար շատ ավելի մեծ է հավանականությունը: Եթե ընտանիքում կա աշխատունակ մարդ, բայց շատ մեծ է երեխաների թիվը, այստեղ մեծանում է նպաստ ստանալու հավանականությունը եւ գործակիցը: Այս գործակիցների միջոցով պետք է հաշվենք»:
Նախարարն ասաց, որ այլեւս նպաստ տալ-չտալու հարցում կարեւոր չի լինելու՝ բնակարանում հեռուստացույց կա՞, թե՞ չկա, ավտոմեքենա կա՞, թե՞ չկա, այլ պետք է հիմնվեն այն գործոնների վրա, թե քաղաքացին ունի՞եկամուտ, կամ կարո՞ղ է ունենալ եկամուտ:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
