«2020թ.-ին գազի գինը սահմանին չի փոփոխվելու: Ինչ վերաբերում է սակագնին, այո, շատ քննարկումներ են եղել եւ դեռ կլինեն: Կա պնդում «Գազպրոմ» խմբի կողմից ներդրումային ծրագիր իրականացնելու, որի նպատակն է գազի արդյունավետ եւ անխափան մատակարարումը: Դրա համար ներդրումներ են անհրաժեշտ»,-կառավարություն-ԱԺ հարցուպատասխանի ժամանակ այսօր հայտարարեց ՀՀ փոխվարչապետ Մհեր Գրիգորյանը՝ անդրադառնալով փաստին, որ ապրիլից «Գազպրոմ Արմենիան» գազի սակագնի վերանայման հայտ գուցե ներկայացնի:
«Ընդ որում, հաշվարկները եւ քննարկումներն իրականացվում են տասը տարվա կտրվածքով: Դա միանգամյա խնդիր չէ: Իհարկե, կան տարաձայնություններ: Մենք չենք ասել, որ համաձայն ենք: Ասել ենք՝ չենք բացառում, որ ապրիլի մեկից հետո նման հայտ կներկայացվի: Մինչ այդ նման անհրաժեշտություն չենք տեսնում: Բոլոր հարցերի պատասխանները կստանանք, երբ նման հայտ ներկայացվի: Այս պահին խնդիրը փորձագետների քննարկումների կարգով պետք է լինի»,-նշեց Մհեր Գրիգորյանը:
Լուիզա ՍՈՒՔԻԱՍՅԱՆ
