«Ընդդիմությունը պետք է հնարավորություն ունենա օգտվելու օրենքով վերապահված հնարավորություններից: Սա մեր քաղաքական կամքն է»,- կառավարություն-ԱԺ հարցուպատասխանի ժամանակ այսօր հայտարարեց վարչապետ Նիկոլ Փաշինյանը՝ անդրադառնալով փաստին, որ Երեւանի քաղաքապետ Հայկ Մարությանի գործունեությունում հնարավոր կոռուպցիոն ռիսկերի ուսումնասիրման նպատակով ԱԺ-ում վերջերս «Լուսավոր Հայաստանի» նախաձեռնությամբ քննիչ հանձնաժողով էր ստեղծվել: Այսօր, սակայն, «Իմ քայլը» չքվեարկեց քննիչ հանձնաժողովի անդամների թվի հաստատման օգտին, նախագիծը տապալվեց, այսինքն՝ քննիչ հանձնաժողովը չի գործի:
Նիկոլ Փաշինյանը նախ տեղեկացրեց՝ Երեւանի ավագանու «Իմ քայլը» խմբակցությունն իրավական վերլուծությամբ եզրակացրել է, որ տվյալ դեպքում ԱԺ քննիչ հանձնաժողով չի կարող ձեւավորվել, որովհետեւ դա չի համապատասխանում ՀՀ Սահմանադրությանը. «Որովհետեւ քաղաքապետարանն ունի իր խորհրդարանը՝ ի դեմս ավագանու: Երեւանի ավագանու գործունեության մասին կանոնակարգում ամրագրված է ավագանու լիազորությունը՝ քննիչ հանձնաժողով ստեղծելու: Ես «Իմ քայլի» այդ վերլուծության մասին տեղյակ եմ պահել ԱԺ նախագահին, այն ուղարկել եմ Արդարադատության նախարարություն, որի գրավոր տեղեկանքում ասվում է, որ Երեւանի ավագանու «Իմ քայլը» խմբակցության հիմնավորումներն իրավական են ճշգրիտ են»:
Փաշինյանը նաեւ տեղեկացրեց, որ հարցը նաեւ «Քաղաքացիական պայմանագրի» վարչությունում են քննարկել. «Նույնիսկ գաղտնիք ասեմ. երբ ՔՊ-ում հարց է դրվել, որ նման իրավական խնդիր կարող է լինել, իրավական վերլուծությունը մեզ հանգեցրել է նրան, որ իրավական ճանապարհով պետք է շարժվենք: Ճշմարտությունը սա է»:
Կարդացեք նաև
Լուիզա ՍՈՒՔԻԱՍՅԱՆ
