Ռուսաստանի սպորտի նոր նախարար Օլեգ Մատիցինը 2012թ. դատապարտված է եղել Ռուսաստանի ֆիզիկական կուլտուրայի, սպորտի և տուրիզմի պետական համալսարանի հողերը ապօրինի վարձակալության հանձնելու համար: Այս մասին գրում է բլոգեր Իլյա Վառլամովը:
Մատիցինը մեղավոր էր ճանաչվել պաշտոնեական լիազորությունների չարաշահման համար և տուգանվել 20 հազար ռուբլով:
Այդ ժամանակ Մատիցինը զբաղեցնում էր համալսարանի ռեկտորի պաշտոնը: Քննությունը պարզել է, որ 2001թ. նա 5 տարով կոմերցիոն կառույցների է հանձնել դաշնային սեփականության տակ գտնվող որոշակի տարածքներ: Նրա գործողությունների արդյունքում առաջացած վնասը գնահատվել է ավելի քան 120 մլն ռուբլի:
Մատիցինը մեղքը չի ընդունել: Պաշտպանները պնդում էին, որ համալսարանական հողատարածքը վարձակալությամբ հանձնելը, ընդհակառակը, օգուտ է բերել պետությանը, երկրի բյուջեն ազատել է «լրացուցիչ միլիոնների ծախսերից» և միաժամանակ այն համալրել է «պատկառելի գումարով»:
Կարդացեք նաև
Մոսկվայի քաղաքային դատարանը Մատիցինին ազատել էր պատժի կրումից՝ հաշվի առնելով այն, որ վաղեմության ժամկետն անցել էր:
Պատրաստեց՝ Վիկտորյա ԱՆԴՐԵԱՍՅԱՆԸ
