Կառավարություն-ԱԺ հարցուպատասխանի ժամանակ այսօր «Իմ քայլի» պատգամավոր Միքայել Զոլյանն Առողջապահության նախարար Արսեն Թորոսյանին խնդրեց տեղեկություններ հայտնել Չինաստանից տարածվող վիրուսի վերաբերյալ ու ասաց, որ արդեն մահացության դեպքեր են գրանցվել: Պատգամավորը հիշեցրեց, որ վերջերս ՀՀ-Չինաստան վիզային ռեժիմը չեղարկվել է:
Արսեն Թորոսյանը նախ տեղեկացրեց, որ միջազգային մակարդակում այս պահին ինտենսիվ քննարկումներ եւ հետազոտություններ են ընթանում, մասնավորապես՝ Առողջապահության համաշխարհային կազմակերպությունում: Ըստ Թորոսյանի՝ աշխատանքներ են ընթանում, որ վակցիանայի միջոց մշակվի:
Նախարարը հայտնեց, որ ՀՀ սահմանին ժամանող ուղեւորների ջերմությունը չափում են, այս պահին դեպք չի գրանցվել. «Մեկ դեպք ԱՄՆ-ում է եղել: Հայտնի վիրուսի տեսակ է, բայց ոչ հայտնի ենթատեսակ: Հատուկ բուժման տեսակ չկա, մնացած վիրուսների պես է բուժվում: Եթե կարիք լինի ՀՀ-ում որեւէ միջոցառում ձեռնարկել, անպայման կձեռնարկենք: Սահման փակելու կամ ուղեւորահոսք սահմանափակելու կարիք այս պահին չկա: Հետեւեք պաշտոնական հայտարարություններին»:
Լուիզա ՍՈՒՔԻԱՍՅԱՆ
