Այսօր Գեղարքունիքի մարզի անասնաբույծներն ու մսավաճառները կրկին փակել էին Սեւան-Երեւան ավտոճանապարհը՝ պահանջելով չեղյալ համարել սպանդանոցներում մորթը կազմակերպելու կառավարության որոշումը՝ հակառակ դեպքում հրաժարվում են մսի մատակարարումից խանութներին ու արտադրամասերին:
«Տեղներդ նստած որոշումներ եք կայացնում, գյուղացու կարծիքը չեք հարցնում: Էդքան գումարներ որ գյուղացու վզին եք դրել, մտածո՞ւմ եք հետեւանքների մասին»,-Գեղարքունիքի մարզպետարանի ներկայացուցիչներին ասում էին բողոքի ցույցի մասնակիցները:
Նրանք պնդում են, որ մորթը սպանդանոցներում իրենց համար լրացուցիչ ծախսեր է պահանջելու՝ զրկելով նաեւ եկամուտներից:
Կարդացեք նաև
Ավելի ուշ սակայն ցույցի մասնակիցները ավտոճանապարհը բացել են, երբ նրանց հետ հանդիպել են Գեղարքունիքի մարզպետարանի գյուղատնտեսության եւ բնապահպանության վարչության պետ Համբարձում Համբարձումյանը եւ Գյուղատնտեսության բաժնի վարիչ Մարտին Պետրոսյանը:
Aravot.am-ի հետ զրույցում Գեղարքունիքի մարզպետարանից հայտնեցին, որ մարզպետարանի պաշտոնյաները բացատրական աշխատանքներ են տարել անասնաբույծների եւ մսավաճառների հետ: Նրանց տեղեկացրել են, որ համբերեն՝ մինչեւ որ կառավարության համապատասխան պաշտոնյաները հանդես կգան հայտարարությամբ համոզմունք հայտնելով, որ մսավաճառների ու անասնաբույծների պահանջը կբավարարի այդ հայտարարությունը:
Հիշեցնենք, որ երեկ էլ ցույցի մասնակիցներին հանդիպել էր Գեղարքունիքի մարզպետ Գնել Սանոսյանը՝ նշելով, որ նրանց մատնանշած խնդիրները բարձրացնելու են կառավարության առաջ:
Լուսինե ԲՈՒԴԱՂՅԱՆ
