Ազգային ժողովն այսօր երկրորդ ընթերցմամբ եւ ամբողջությամբ ընդունեց քրեական ենթամշակույթ ստեղծելը, այն ղեկավարելը կամ դրան հարելը քրեականացնող օրինագիծը, որը քննարկումների փուլում բուռն բանավեճերի առիթ էր տվել: «Կողմ» քվեարկեց 73, «դեմ»՝ 20, իսկ «ձեռնպահ»՝ 15 պատգամավոր:
Քվեարկությունից առաջ «Լուսավոր Հայաստան» խմբակցության անունից պատգամավոր Տարոն Սիմոնյանը հայտարարեց՝ մնացել են համոզմունքին, որ այս օրինագծի իրավակարգավորումներն անորոշությամբ են պատված. «Խնդիրներ են առաջանալու, եւ կառավարությունը կրկին վերադառնալու է ԱԺ ամբիոն՝ խնդրելով փոխել այդ օրենքը: Մենք չենք կարող «կողմ» քվեարկել, «ձեռնպահ» ենք քվեարկելու»:
Հիշեցնենք, որ այս օրինագծի քննարկման ժամանակ երեկ ԱՀ դահլիճում պատգամավորների մասնակցությամբ միջադեպ էր եղել:
Լուիզա ՍՈՒՔԻԱՍՅԱՆ
