Ինչպես արդեն տեղեկացրել ենք՝ Ռոբերտ Քոչարյանի եւ մյուսների գործով դատական այսօր նիստը որոշվեց հետաձգել, նիստին չէր ներկայացել պաշտպանական կողմը:
Մեղադրող դատախազ Պետրոս Պետրոսյանն այս առնչությամբ լրագրողներին ասաց՝ պաշտպանական կողմը արհեստականորեն եւ միտումնավոր ձգձգում է դատական նիստերը. «Դատարանն արդեն արձանագրել է պաշտպանների կողմից իրենց դատավարական պարտականությունները չարամտորեն չկատարելու հարցը»:
Պաշտպանների այն պնդմանը, որ տուժողների իրավահաջորդները դատարանում սպառնալիք են հնչեցնում, Պետրոսյանն այսպես արձագանքեց. «Մենք որեւէ սպառնալիք չենք դիտարկել, այլապես մենք կարող էինք ինքնուրույն դրա վերաբերյալ որեւէ դատավարական գործընթաց նախաձեռնել: Մենք մեր հայտարարություններով եւս անդրադարձել ենք այդ հարցին եւ դատավարական կողմերին հորդորել՝ եթե նման ընկալում եղել է, որովհետեւ սպառնալիքը սուբյեկտիվ ընկալում է, եթե եղել է սպառնալիքի մասին հաղորդում կներկայացնեին դատախազությունն ու մյուս իրավապահ մարմինները կնախաձեռնեին համապատասխան վարույթ»:
Կարդացեք նաև
Յուրի Խաչատուրովի պաշտպան Միհրան Պողոսյանն էլ լրագրողների հետ զրույցում ասաց, որ դատարանում շարունակաբար սպառնալիքներ են հնչում, դատարանը պատշաճ գնահատական չի տալիս. «Իմ փաստաբանական գործունեությունը խոչընդոտող սպառնալիքներ են եղել: Դատախազությունը եթե հանդիսանար օրենքի պաշտպան, հենց տվյալ դատական նիստում պետք է համապատասխան գործողություն կատարեր՝ քրեաիրավական հետեւանքով: Տեսանք դատախազության եւ դատարանի լռությունը: Եվ ամիսներ շարունակ սա դատարան բերելու վերջնարդունք է: Եթե այս գործողությունները կանխվեին նախորդ ժամանակաշրջանում, եթե ՀՀ-ն զոհված անձանց հարազատներին դրամական փոխհատուցում չտրամադրեր գոնե այս գործի քննության փուլում, ինչը իմ պատկերացմամբ՝ քաջալերել է նման վարքագիծը, համոզված եմ, նման գործողություններ չէին լինի»:
Պաշտպանն ասաց, որ որեւէ միտում չունեն նիստերն արհեստական հետաձգելու. «Բայց ես ինքս չեմ պատրասվում ներկայանալ մի գործընթացին, որտեղ չի ապահովվել եւ չի երաշխավորվել իմ իրավունքների եւ պարտականությունների ամբողջական իրացումը»:
Նշենք, որ հաջորդ նիստը նշանակվեց փետրվարի 4-ին: Հաջորդ նիստին պաշտպանը կներկայանա, թե՝ ոչ, ասաց, որ առայժմ որոշում չունի, բայց կարող է անընդհատ չներկայանալ նիստերին:
Նելլի ԲԱԲԱՅԱՆ
