Ուզբեկստանի նախագահ Շավքաթ Միրզիյոևը, ըստ որոշ լրատվամիջոցների ոչ միանշանակ հայտարարություն է արել՝ կապված «ինտեգրացիոն միավորմանն» անդամակցելու հետ: Չնայած միավորման անունը նա այդպես էլ չի հիշատակել, կարելի է ենթադրել, որ խոսքը Եվրոպական տնտեսական միության (ԵԱՏՄ) մասին է, գրում է ռուսական «Կոմերսանտ» թերթը և հիշեցնում, որ Ուզբեկստանի՝ ԵԱՏՄ-ին հնարավոր անդամակցության քննարկումները սկսվել էին դեռ նախորդ տարվա հոկտեմբերին:
Ելույթ ունենալով խորհրդարանում՝ նախագահն ասել է, որ հանրապետությունը ստիպված է գործակցել Ռուսաստանի և Ղազախստանի հետ, քանի որ այնտեղ Ուզբեկստանի բազմաթիվ քաղաքացիներ են ապրում: Հետո, ըստ որոշ լրատվամիջոցների, Միրզիոևն ակնարկել է, որ իրենք պատրաստվում են սահմանափակվել ԵԱՏՄ-ում դիտորդի կարգավիճակով: «Գիտեք, որ քաղաքական տեսանկյունից ոչ մեկ չի հանձնի մեր անկախությունը, դա ձեր ձեռքերում է և նախագահի ձեռքերում, որին վստահել է ժողովուրդը,- ասել է Միրզիոևը՝ ըստ ՏԱՍՍ-ի:- Մենք այնտեղ չենք մտնում որպես անդամ, այլ որպես դիտորդ, ուսումնասիրում ենք՝ արդյոք դա մեզ հարմար է, թե ոչ»:
Ուզբեկական Kun.uz պարբերականը այլ կերպ է փոխանցում նախագահի խոսքերը. «Իմացե՛ք մի բան: Ոչ մեկ երբեք ոչ մեկի չի հանձնի անկախությունը: Անկախությունը նախագահի ձեռքում է, որին վստահում է ժողովուրդը: Մենք չենք լինի միության անդամ»: Նույն հոդվածի ուզբեկերեն տարբերակում էլ հավելված է հետևյալ արտահայտությունը. «Դիտորդ՝ չի նշանակում անդամ: Դիտորդի կարգավիճակում մենք կտեսնենք՝ ինչն է մեզ համար լավ, ինչը՝ վատ»:
Այնուամենայնիվ, «Կոմերսանտը» նկատում է, որ պետական УзА լրատվական գործակալությունը հրապարակել է Շավքաթ Միրզիոևի ամբողջական ելույթը խորհրդարանում, որում նման հայտարարություն չկա, և ընդհանրապես, այնտեղ բացակայում են «ինտեգրացիա», «Ռուսաստան», «Ղազախստան», «անկախություն» բառերը:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
