Այսօր քրեական ենթամշակույթը կրող անձանց մասին օրենքի նախագիծն էր քննարկվում ԱԺ-ում՝ երկրորդ ընթերցմամբ: Ինչպես հայտնել ենք, ԲՀԿ պատգամավոր Գեւորգ Պետրոսյանի եւ ԱԺ պատգամավոր Արման Բաբաջանյանի ելույթից հետո թեժ վիճաբանություն եղավ: Իմքայլական եւ «Լուսավոր Հայաստանի» պատգամավորներին մի կերպ հաջողվեց ԲՀԿ-ականներին հանդարտեցնել:
ԲՀԿ խմբակցության քարտուղար Արման Աբովյանն ավելի ուշ իր ելույթում հայտարարեց. «Արդեն որերորդ անգամ է՝ Արման Բաբաջանյանը սադրում է: Սադրում է ուղիղ, անուղիղ: Ես չհասկացա՝ ի՞նչը բորբոքեց պարոն Բաբաջանյանին, որ մենք այսօր տեսանք մեկ դերասանի թատրոն: Ի՞նչ էր ասել Գեւորգ Պետրոսյանը, խնդրում եմ եւս մեկ անգամ լսել՝ վիրավորե՞լ է, ինչ-որ վիրավորա՞նք է հասցրել, կպե՞լ է, ի՞նչ է ասել»:
Նիստերի դահլիճից արձագանքեցին, որ վիրավորել է, Աբովյանը չհամաձայնեց: Ըստ նրա, Արման Բաբաջանյանը սադրում է, որ հետո մի գրառում անի, թե ԲՀԿ-ն պաշտպանում է կրիմինալը. «Ոչ, չի ստացվի մեր վզին փաթաթել այն, ինչ գոյություն չունի: ԲՀԿ-ն պաշտպանում է քաղաքացու իրավունքը եւ այս օրենքը ոտնահարում է հենց քաղաքացու իրավունքները: Ես կոչ եմ անում բոլորին հանգստանալ, չլարենք, չսրել: Արդեն իսկ ֆեյսբուքում տեսնում ենք գրառումներ, որը պարզապես անընդունելի է»:
Աբովյանն ասաց, որ եթե կարգապահական պատճառով ԱԺ նիստերի դահլիճից 4 պատգամավոր է հեռացվում, ապա պետք է հեռացվի նաեւ սադրիչը՝ պարոն Բաբաջանյանը:
Կարդացեք նաև
Արարատ Միրզոյանն արձագանքեց. «Էդ լավ է, որ էդպես եք կարծում, պարոն Աբովյան, բայց էդպիսի կարգապահական տույժ կիրառելու իրավունք ունի միայն նիստը նախագահողը»:
Աբովյանի ելույթից պարզ դարձավ, որ ԱԺ նիստերի դահլիճից, որպես կարգապահական տույժ, հեռացվել են ԲՀԿ-ական պատգամավորներ, գլխավոր վիճաբանողներից էր Արայիկ Աղաբաբյանը, բայց նրա հետ միասին դուրս եկան Վարդան Վարդանյանը, Հրանտ Մադաթյանը, Արթուր Դալլաքյանը:
Հռիփսիմե ՋԵԲԵՋՅԱՆ
