Ինչպես տեղեկացրել ենք, այսօր քրեական ենթամշակույթը կրող անձանց մասին աղմկահարույց օրենքի նախագծի երկրորդ ընթերցմամբ քննարկման ժամանակ ԱԺ-ում ԲՀԿ պատգամավոր Գեւորգ Պետրոսյանի եւ ԱԺ պատգամավոր Արման Բաբաջանյանի ելույթից հետո թեժ վիճաբանություն եղավ: Իմքայլական եւ «Լուսավոր Հայաստանի» պատգամավորներին մի կերպ հաջողվեց ԲՀԿ-ականներին հանդարտեցնել, ուզում էին մոտենալ Արման Բաբաջանյանին եւ հաշիվ մաքրել:
Որոշ ժամանակ նորից կրքերը թեժացան: Գեւորգ Պետրոսյանին բառացիորեն ձեռքերով բռնել էին Իվետա Տոնոյանն ու Նաիրա Զոհրաբյանը, տեղից ուզում էր վեր կենալ: ԱԺ նախագահ Արարատ Միրզոյանը հարցրեց. «Պարոն Պետրոսյան, ռազբորկա՞ եք ուզում անել»: Պետրոսյանն արձագանքեց. «Ստեղ չէ»: Արարատ Միրզոյանը բարկացավ՝ «Չէ, ուրեմն նստեք տեղդ ու մի գնացեք նախորդ ելույթ ունեցողի մոտ»:
ԲՀԿ պատգամավորները նորից ոտքի կանգնեցին, «Իմ քայլի» պատգամավորները փակեցին նրանց առաջը՝ թույլ չտալով ծեծկռտուք: Վերջապես տաքացած մի քանի ԲՀԿ-ականներ նիստերի դահլիճից դուրս եկան:
Այդ լարված վիճաբանության ժամանակ Արման Բաբաջանյանը ձեռքը դրած դնչի տակ՝ հետեւում էր:
Կարդացեք նաև
«Իմ քայլի» պատգամավոր Վլադիմիր Վարդանյանը, մոտենալով ամբիոնին, ասաց. «Էսօրվա նիստից հետո ես մտածում եմ, գուցե ԱԺ նիստերը հեռուստատեսությամբ հեռարձակելուց առաջ 18+ նշում անեն, որովհետեւ այն, ինչ տեղի է ունենում, առնվազն համահունչ է այն արժեքների հետ, որոնց մասին մենք խոսում ենք ամեն օր, խոսում ենք ֆեյսբուքում, ԶԼՄ-ներով»:
Հռիփսիմե ՋԵԲԵՋՅԱՆ
